Shillong, Nailar 03 : Ka HSPDP hadien ba ka la pynduh tiket ïa u MLA jong ka na Mawkyrwat, Bah Renikton L Tongkhar mynta ka la ap sa ka jubab na MLA na Sohiong, Bah Samlin Malngiang ha shwa ba kan ïaid shakhmat na ka bynta ka elekshon MLA kaban long ha u 20223.
Kumban shu kdew hangne, ka HSPDP ha u 2018 ka jop arngut ki kyrtong, kata u Bah Renik na Mawkyrwat bad u Bah Samlin na Sohiong.
Hynrei haba kren bad ki lad pathai khubor, ki nongïalam ka party ki la ïathuh ba mynta pat, ka party ka la dep ban pynieng da uwei pat u kyrtong na Mawkyrwat, Bah Medal Sing ban aireng pyrshah ïa u Bah Renik ha u 2023.
“Phin ym sngewphylla shuh ba ngi la dep ruh ban pynbna ïa u Bah Medal Sing Lyngdoh kum u kyrtong ka party na Mawkyrwat. Ka la paw shai hi kumba ngi hi ngi sngewthuh ba i la leit noh sha kiwei pat ki party,” ong u Bah Panbor L Ryntathiang, General Secretary ka party haba kren bad ki lad pathai khubor.
La ïathuh ruh ba halor u MLA ka Sohiong pat, u Bah Panbor u la ong ki la shem shitom haduh katta katta ban ïa kynduh ïa u Bah Samlin watla na ka liang jong u bad u Bah Pangniang ki la pyrshang ban kynduh bunsien ïa u.
“Hynrei kum ka party ngim kwah ban leh kyrkieh bad mynta ngi dang ap la u Bah Samlin un ïaleh ne ym ïaleh shuh naka party jongngi ha u 2023.” La sngewthuh ruh ba na ka liang ka party ki la dep ruh ban artatien lypa wat ïa u Bah Samlin ba un ïakhun biang na ka HSPDP ha u 2023.
U President ka party pat, Bah KP Pangniang u la ïathuh ba ki la aiti ha u Senior Vice President ka party, Bah Martle N Mukhim ba dei ruh u MDC ka Party na Mawkynrew ban ïa kren bad u Bah Samlin khnang ban ïoh noh ïa ka jubab kaba shai.
