Naduh u 1972 hap pyntreikam ïa ka Roster, yn duna ki Khasi ban ïoh kam habun ki tnad: Disparsing

Shillong, Nailar 03: U Nongwad RTI Bah Disparsing Rani ha ka sngi Balang u la ïathuh ba ki samla Khasi kiba wad kam kin kham shem shitom ban ïoh kam ha ki Head Office jong ki tnad treikam jong ka Sorkar Jylla namar kiba bun ki Khasi ki kham tam ban ïa ki Garo kiba trei ha kine ki ophis. U la ong kane ba kane ka dei namar ka sorkar ka la hap pyntreikam ïa ka Roster System ha ka Reservation Policy kaba la rai ban pyntrreikam naduh u snem 1972.
U Bah Disparsing u la ïathuh ba kane ka jingpyntreikam ïa ka Roster System ka dei namar ba ka Meghalaya High Court ka la ai jingbthah ïa ka sorkar jylla hadien ba ka la don ka jingai Case na ka ZR Marak bad hadien pat ka ïing Kashari la shim pat ban bishar lyngba ka Public Interest Litigation(PIL)
Haba kren bad ki lad pathai khubor u Bah Disparsing u la ong ba nangne shakhmat u Bah Disparsing u la ïathuh ba kat kum ka jingwad jingtip lyngba ka RTI kaba u la ïoh na ka tnad Personnel and Administrative Reforms ka sorkar jylla ka la rai ba kan pyntreikam ïa ka Roster System ha ka jingthungkam ha ki Head Office kum ha ophis u chief Engineer , ki Directorate naduh u snem 1972. U la ong ba da kane ka rai ki tnad sorkar baroh kin hap ban bud thik ïa ka Reserervation policy ha kaba ki nongtrei kin dei beit ban don 40% ki Khasi, 40% ki Garo, kiwei pat ki riewlum 5% bad kiwei kiwei pat 15%. U la ong ba ki tnad sorkar kiba la bun ki Khasi kiba ïohkam ha kita ki ophis ka sorkar kan hap ban pyndap ïa ki Garo tad haduh ba ka jingdon ki nongïoh kam kin ïa ryngkat hapdeng ki Khasi bad Garo.
U Bah Disparsing u la ïathuh ruh ba ka sorkar ha ki ophis kiba dei pat ha ki District kum ha ki ophis ki Executive Engineer yn ym treikam ka bhah thungkam 40% na ki Khasi bad ki Garo hynrei yn bhah beit ba 80% na bynta ki nongshong shnong pura jong kata ka District.
Haba ïadei bad ka jingïohkam ba dang shen ki Khasi tang 3 ngut katba ki Garo pat 7 ngut ha High Court ka dei namar ki Khasi kiba trei hangne ki la kham tam ban ïa ki Garo bad u la ong ba kum kane ka yn dang sakhi sa .
U Bah Disparsing u la ïathuh ba da kane ka jingpynrtreikam ïa ka Roster ka sorkar kan hap khyllie biang ïa ki File baroh ban wad la ka jingthungkam ka ïahap ne em kat kum ka Reservation Policy bad lada kam don ka jingïaryngkat ka sorkar kan hap phai khmat ban thung kam ïa ki Garo ne Khasi kat kiba kham duna ha ka ophis.
Shuh shuh u la ïathuh ruh ba nangne shakhmat kino kino ki tnad sorkar kiba khot ïa ki application ban thung kam kin hap ban kdew shai katno ngut ki Khasi bad katno ngut ki Garo la bhah ha kata ka jinglait kam.