3 NGUT KI NONGïALAM PHAH KA hnlc SHA KA JINGïAKREN ïASUK

Ki nongïakren ïasuk kiba paw kyrteng haduh mynta:
HNLC:
1. Bah Manbhalang Jyrwa,Vice Chairman
2. Bah Aristerwell Thongni,Political Secretary
3. Bah Phrangkupar Diengdoh,Foreign Secretary
4. Bah Sadon K. Blah,Ksiang
Sorkar Jylla:
1. Bah Peter Dkhar (Retd. IAS) Ksiang
Sorkar Pdeng
1. AK Mishra (IPS Retd.) Ksiang

Shillong, Nailar 03: Ka Hynñiewtrep National Liberation Council (HNLC) kan phah ïa ki 3 ngut ki Nongïalam jong ka Seng ban ïashim bynta ha ka jingïakren ïasuk bad ka sorkar pdeng ryngkat ka jingïadon lang ka sorkar jylla.
Kine ki lai ngut ki long u Vice Chairman Bah Manbhalang Jyrwa, u Political Secretary Bah Aristerwell Thongni bad u Foreign Secretary Bah Phrangkupar Diengdoh. Kine kin wan ryngkat bad ki arngut ki Shipai pahara jong ki ne ki Personal Security Officers, u Bah Aiborlem Diengdoh bad u Bah Storgy Lyngdoh.
Ha ka kyrwoh ba la pyllait da u Bah Saiñkupar Nongtraw, General Secretary uba long ruh ha kajuh ka por u Publicity Secretary ka Seng, la ïathuh ba dei naduh u snem 2004 ba ka HNLC ka la tyrwa ïa ka jingïakren ïasuk hynrei kam shym la long kam satia, wat lada ka Congress ka don ha bor ha ka sorkar jylla bad ha ka sorkar pdeng ruh.
U Bah Nongtraw u la ong ba ha ka snem 2014 ruh ha ka jingkyrpad u Lat ka jylla ha katei ka por, u RS Mooshahary ban wan sha ka jingïakren ïasuk, ka HNLC ka la pdiang, hynrei kijuh ki sorkar ba ïalam da ka Congress kim shym la pdiang ïa ka jingtyrwa ka Seng. “Ngi la pdiang ïa ka jingtyrwa u Lat Mooshahary ha katei ka por, hynrei ka sorkar Congress ha jylla bad ha ka sorkar pdeng kam shym la pdiang satia”, la ong u Bah Saiñkupar.
Ka kyrwoh ka ong ruh ba mynta ha kane ka kynti ha ka jingsynshar ka sorkar MDA ha jylla bad ka sorkar NDA ha Delhi, ka HNLC ka don ka jingkyrmen ba ka jingïakren kan ïaid shakhmat. “Ha ki khyndiat bnai baladep, ka jingïakren ka la ïaid ha ka lynti kaba dei namar ka jingïatreilang ka sorkar jylla bad ka sorkar pdeng. “Kane ka rai jong ka Seng ban phah ïa ki nongïalam jong ka ban ïashim bynta ha kane ka jingïakren ïasuk kadei namar ba ka ladon ka jingïashaniah mar kylliang hapdeng ka HNLC, nangta u ksiang jong ka sorkar pdeng, u AK Mishra (Retd. IPS) na ka tnad korbar ri, nangta u Bah Peter Dkhar (Retd. IAS) bad u Bah Sadon Blah, uba mih khmat na la liang ka Seng, uba long ruh u President ka HNYF.
Ha kajuh ka por ka Seng ka ai khublei ruh ïa ka sorkar kaba la shah ïa ki nongïalam ka Seng ban wan phai sha ïing da ka lynti ka bym don jingsyier eiei namar ka Seng ka ngeit ba ka jingshngaiñ bad ka jingïada ïa ki Nongïalam ka Seng kadei kaba donkam eh bad kaba ym lah ban kheiñ sting da lei lei ruh. “Ki nongïalam jong ngi, kidei ban don ka jingsngew shngaiñ bad sngew laitluid bad kam dei bam long ha kata ka rukom ba kin shah set kut ha ïing”, la ong ka kyrwoh na ka Seng.
Shuh shuh ka Seng ka ong ba katba kane ka jingïakren ïasuk ka dang ïaid, na ka liang ka HNLC ka kut jingmut ban pynlong kam beit bad kan pynpoi haduh ban da ïoh kheit ïa u soh ka jingjop. Hynrei lada jia pat ba ka jingïakren ïasuk ka pulom, ki nongïalam jong ka Seng kidei ban wanphai khlem don kano kano ka jingshah pyndik ne shah pynthut lada ki don ha kano kano ka jaka kaba ka sorkar kan pynbeit. Haba pynpaw ka jingkyrmen ba kane ka jingïakren ïasuk kan ïaid beit, u Bah Saiñkupar u ong, “Ka HNLC ka shimkhia bad kut jingmut na ka bynta ka jingsuk, ngi khmih lynti ruh ïa kajuh na ka liang ka sorkar ruh”.
U kyrmen ruh ba kane ka jingïakren ïasuk kan long kham kloi na ka bynta ka jingbit jingbiang lang baroh bad khamtam eh na ka bynta ka shongsuk shongsaiñ ha ka jylla.