Hiar ki nongïalam KSU CEC sha Hingaria ban sam khusnam 1st Bull N Lyngdoh Achievers Awards
La pyntian smai ïa ki dkhot bad nongïalam ka KSU Hingaria Unit
Khliehriat Naiwieng 16 : Ki nongialam jong ka Khasi Students’ Union (KSU) Seng Kmie bad kynthup u General Secretary, u samla Rueben Najiar, u samla Andrew Gary Dkhar, uba dei u Assistant Education Secretary, KSU CEC; u Samla Sandy Sohtun, Assistant Organising Secretary, KSU CEC; lem bad ki dkhot hynnin ka sngi saitjaiñ ki la hiar sha shnong Hingaria ba don ha khappud bad ka ri Bangladesh ha East Jaiñtia Hills District ha kaba la ioh ban pynlong ïa ka prokram sam khusnam sha ki samla pule bad pynkup burom ïa ki rang ialehkai sports kiba na ka thaiñ da ka 1st Bull N Lyngdoh Achievers Awards 2025-2026 bad la ioh ruh ban pyntian smai ïa ki dkhot bad nongïalam jong ka KSU Hingaria Unit.
Kiba ioh ïa ka khusnam 1st Bull N Lyngdoh Achievers Awards 2025-2026 hynnin ka sngi saitjaiñ ki dei ki samla pule bad rang ialehkai sports kiba hap hapoh ka jingpeit jingkhmih ka KSU South West Border Circle, East Jaiñtia Hills District.
Haba kren kum u kongsan u samla Rueben A. Najiar u la ai ïa ki kyntien sneng, kyntu sha ki nongïalam bad dkhot jong ka KSU Hingaria Unit ba kin long ki nongïalam kiba trei shitom, kiba don ïa ka mynsiem len lade bad kiba aiti lut na ka bynta ka bha ka miat jong ka shnong, ka dong bad ka thaiñ hi baroh kawei, u la ban jur ruh da kaba ong ba ka kamram jong ka seng kam dei tang ban mih ha ki por ba don ki jingeh, hynrei ban long ruh ka sur bad ki nongïada ïa ki nongshong shnong, khamtam ban ïeng pyrshah ïa kino kino ki jingleh donbor bad ka jingbym suitñiew jong ki bor Sorkar ïa ki shnong nongkyndong, khamtam eh ïa ki shnong khappud.
Haba phai pat sha ki samla kiba la ïoh pdiang ïa ki khusnam, u samla Rueben A. Najiar u la ong ba ka jingai khusnam jong ka Seng kam dei satia ka jingai sngewbha kaba khlem jingmut, hynrei ka dei ka jingithuh bad ka jingburom ïa ka jingtrei shitom, ka jingaiti bad ka jingminot jong ki samla ha ka pule puthi bad ha ki kam ïalehkai sports.
U la kyntu ïa ki samla ba kim dei ban duh jingkyrmen ne sngewpher tang namar ba ki wan na ki shnong nongkyndong, namar ha man la ki jingïaleh, la ka long ha ka pule puthi ne ha ki kam ïalehkai sports, ki samla na ki shnong nongkyndong ki la pyni ba ki lah ban jop bad ban wanrah nam ïa ka Jylla. U la pynkynmaw ruh ba ka jingtrei shitom ka dei ka nongrim jong ka jingjop, bad u la kyntu ïa ki samla ba kin ïai bteng ban trei shitom bad ban long ki nuksa sha kiwei pat.
Ha kane ka prokram ha shnong Hingaria la ïa donlang ruh General Secretary, KSU East Jaiñtia Hills District Unit,u bah K. S. Suchiang,u Publicity Secretary, KSU CEC; u bah Pynshai Kupar Dkhar, u President,
KSU South West Border Circle, u samla Garnes Talang lem bad ki dkhot, ki nongïalam jong ka South West Border Circle, la ïa don lang ruh ki Waheh Shnong na ki shnong bapher bapher na ki shnong khappud jong ka East Jaiñtia Hills District kiba la wan ban ai mynsiem bad pynshngaiñ ïa kane ka prokram jong ka seng KSU.
Ki Nongïalam bad Dkhot jong ka KSU Hingaria Unit kiba la shah pyntian smai ha kane ka sngi ki kynthup u President, u samla Samson Lamin, u Vice President, u Reminder Sohkhlet, General Secretary, u samla Kyntiew Khongstia, Assistant General Secretary, u samla Paulus Pohlong, Organising Secretary, u samla Banlumlang Lamin, Assistant Organising Secretary, u Tuffan Pohlong, Education Secretary, u samla Anthony Pohti, Publicity Secretary, u Juneniky Khonglah, Sports Secretary, u Korek Myrlia, Environment Secretary, u Rijol Suchiang, Finance Secretary, u Charles Dkhar lem bad khatwei ngut ki dkhot Executive.
La ong ba kane ka jingpyntian smai bad ka jingpynkup burom ka long ka dak jong ka jingkyrshan, jingithuh bad jingai mynsiem jong ka Seng ïa ki nongïalam thymmai, ki samla pule bad ki rangïalehkai sports, khnang ba kin nang kham trei shitom bad aiti lut ha ki kam shakri paidbah, ha ka pule puthi bad ka jingpynroi ïa ka imlang sahlang, khamtam eh ha ki shnong khappud, pynkut u kyrwoh na u Publicity Secretary Khasi Students’ Union (KSU) Hingaria Unit South West Border Circle, East Jaiñtia Hills District, u samla Samla Juneniky Khonglah .