Mawkyrwat, Naiwieng 05: Ka KSU Mawkyrwat Circle hadien ba ka la ïoh jingtip ba ka sorkar ka la don jingthmu ban wan rah da u ophisar bym dei khasi (non-khasi) ha ka tnad pule puthi hapoh South West Khasi Hills District, Mawkyrwat, mynta ka sngi Palei jong ka taïew ka la leit ban ai jingthoh hapoh ka ophis jong ka Deputy Commissioner, South West Khasi Hills District ban pyrshah ïa kane ka bynta.
Kum ban shu kdew ba ka jingthmu jong ka sorkar ban wanrah ophisar bym dei ka dei ha ka post Sub-Divisional School Education Officer (SDSEO), Mawkyrwat ha kaba ka buh ruh ka jingthoh ba ïa u Dhananjay Upadhya, uba long u -Divisional School Education Officer (SDSEO), Resubelpara, ym phah ha ka kam Sub-Divisional School Education Officer (SDSEO), Mawkyrwat.
Kumta, ka KSU lyngba u bah Rutherford Lyngdoh, President ka Khasi Students’ Union (KSU) jong ka Mawkyrwat Circle haba ai jingkren sha ki lad pathai khubor ha ophis treikam jong ka seng u la pynpaw ïa ka jingpyrshah halor kane ka jingthmu ban wanrah ïa u ophisar bym dei khasi namar kan sa wanrah shibun ki jingeh ïa kiba leit donkam hapoh ophis haba ïa dei bad ka ktien ka thylliej.
Shuh shuh ka seng ka la pynpaw ruh ba ïa ka kam SDSEO, Mawkyrwat, dei ban ai lad ïa ki ophisar Khasi kiba don ïa ka jingnang jingstad, ka jingbit bad ki jinglong kiba biang ban trei ïa kane ka kam, khamtam ïa kiba sngewthuh ïa ka jinglong jingman jong ka jaka, ka imlang sahlang, ka kolshor bad ki jingeh kiba ïakynduh ha ka liang ka pule puthi jong kane ka thaiñ.
Ka seng ka la kdew ruh ba ka South West Khasi Hills District ka dei ka distrik kaba bun paid tam da ki Khasi. Kumta, lada thung ïa u ophisar Khasi uba don ïa ki jingbit jingbiang ha kane ka kam kaba kongsan, kan ïarap ban pynsuk ïa ka jingïakren, ka jingsngewthuh markylliang bad ka jingïatreilang hapdeng ka tnad pule puthi bad ki skul, ki nonghikai, ki kmie ki kpa, ki bor synshar tynrai bad ki paidbah ka thaiñ.
Ha kajuh ka por, ka seng ka maham ruh ba lada ka Sorkar kam shimkhia ban bishar biang bad pynbeit ïa kane ka jingdawa kaba dei bad kaba pynpaw ïa ka jingsngew jong ki paidbah nongshong shnong, ka seng kan shim ïa kiwei pat ki sienjam, kynthup ïa ki bynta ban pynbor ïa ka Sorkar ban pynurlong ïa ka jingdawa jong ka.
