Shillong, Naiwieng 05: Hynriew ngut ki samla pule kiba don jingïapher ha ki dkhot met na Meghalaya kiba dei napdeng ki 77 ngut ki riewstad na ki phra tylli ki jylla ka thaiñ shatei lammihngi kiba la shah pynkup burom hapoh ka Indus Towers Scholarship Programme (ITPS) na ka bynta ka snem pule 2026-27.
Katei ka jingrakhe kaba la pynlong ha Guwahati ha ka 29 tarik u Risaw, ka dei ka jingdap shiphew snem jong ka jingthmu ba kongsan jong ka CSR da ka Indus Towers Limited bad ka paralok pyntreikam jong ka ka Shishu Sarothi.
Kane ka cohort mynta u snem ka kynthup ïa 47 ngut ki samla pule na Assam, 11 ngut na Nagaland, 8 ngut na Mizoram, 6 ngut na Meghalaya bad 5 ngut na Tripura, kiba dang pule ïa ki jingpule Certificate, Diploma, Undergraduate bad Postgraduate.
Ka Myntri ka tnad pynkup bor jong ka sorkar Assam ka Ashwini Ray Sarkar ka la wan kum ka kongsan bad ka la ïaroh ïa ka jinglah jong ki riew shemphang.
Ka prokram ka weng ïa ka jingduna kaba khraw ha ka jingpule kaba kham shalor, ha kaba ki samla pule kiba don jingïapher ha ki dkhot met ki don tang 0.2 percent na ki jingpynrung kyrteng ha ka ri baroh kawei, katkum ka ka kaiphod ka AISHE 2021-22.
Naduh ba la sdang ha u snem 2016, ka Indus Towers Scholarship Prokram hapoh ka rynsan jong ka CSR ‘Saksham’ ka la ai bor ïa palat 900 ngut ki samla pule kiba don jingïapher ha ki dkhot met ha kylleng ka thaiñ Shatei Lammihngi. Ha baroh kawei ka ri, 200 ngut ki samla pule ki shah kyrshan ha kane ka prokram bad ka por ba dei ban pule.
U Rajender Gurung CEO ka Circle – NESA, Indus Towers u la ong ba ka jingïatreilang kaba shiphew snem bad ka Shishu Sarothi ka dei ka nuksa kaba sngew sarong jong ka jingshimkhia jong ka kompeni ban pynkupbor ïa baroh lyngba ka jingnang jingstad bad ka lad ka lynti kaba donkam.
