Pynlut ka dorbar shnong Mawkhar haduh 70% ka fund ban kyntiew ïa ka Mawkhar Sports Club: President MSC

Shillong, Naiweng 02: Ka Mawkhar Sports Club ha ka sngi nyngkong ka la pynkup burom ïa ki 34 ngut nongïalehkai Football jong ka Club ha Khasi National Dorbar Hall, Mawkhar, kaba kane ka Club la ïoh rah ïa ka nam lah duh ha ka First Division Football League, 2026 ba la pynlong da ka Shillong Sports Association bad ka la kiew sha ka Super league.
Ha kane ka sngi la donlang ka seng Kynthei Women’s Welfare Organisation kaba dei ka nongkyrshan kaba khlaiñ bha ïa ka kynhun, ki dkhot ka Executive Committee ka Dorbar Shnong Mawkhar, ka Seng Rangbah, ka Seng Samla Mawkhar bad kiwei kiwei.
La pynïaid ïa ka prokram da u Rangbah Shnong u Bah Ransom Sutnga uba dei ruh u President ka Mawkhar Sports Club uba la kren maitphang, nangta na u Bah Ksan Kupar Warjri, General Secretary ka Club, nangta ki dkhot ka jingïaseng seng longkmie Synod Sepngi kiba la synniang pisa ïa ka Club, nangta la donlang na ka Brightstar Academy na Pyndengrei, Nongstoiñ, kaba dei kawei na ki club ba don bynta bad ka Mawkhar Sports Club.
Haba kren lyngkot halor ka jingïaid lynti jong ka Club, u Rangbah shnong u Bah Ransom Sutnga uba dei ruh u President ka Club, u la ïathuh ba ka Dorbar Shnong ka la pynlut haduh 70% ka fund ban kyrshan bad kyntiew ïa ka Club bad na ka daw ka jingbym lah ban ïoh ki nongïalehkai napoh ka shnong bad ka jingthmu ban kyntiew ruh ïa ka Brightstar Academy ka Mawkhar Sports Club ka la ïasoi ïa ka MoU ha u snem 2024 ban kyntiew ïa ka Academy bad khamtam eh ïa ka Club baroh kawei.
“Wat haba sdang ngi hap shim ïa ka risk naba ngim tip la ngin kiew ne ngin hiar, hynrei sngewkmen pat ba mynta ka club ka la jop ïa ka SSA First Division Football League, 2026 bad mynta ka la kiew sha ka Super League bad ngi kitbok ba kan nang ïai kiew shuh shuh shakhmat bad ki nongshong shnong ki don ka bynta kaba khlaiñ naba ki don napdeng jong ki kiba la kyrshan ratbah ïa ka kynhun ha kiba bun ki liang,” ong u Bah Sutnga.
La ïoh ka jingkren ai mynsiem bad kitbok kitrwiang na u Bah Keansly Basaiawmoit Assistant Rangbah Shnong, na ka Vice President Seng kynthei Welfare Organisation Kong M Nongrum, ki jingkren na ki nongïalehkai, ki Coach, nangta la don ruh ki jingduwai na ka Jingïaseng Kynthei KJP Synod Sepngi bad ka jingai khublei na u Secretary ka Club u Bah Ksan Kupar Warjri.
Ha kane ka sngi na ka liang ka seng Kynthei Mawkhar Welfare Organisation ka la synniang pisa ruh kumba T. 50 hajar tyngka sha ka Club ba kan nang pyntyllun ïa ki kam bad ka jingsam ïa ki Mementos sha ki nongïalehkai ka club, ki nongïarap baroh, ïa kiba ju kyrshan bad kiwei kiwei.