Lada ka riti dusur ka im ka jaitbynriew ka im, kut noh ka 34th Zonal Karbi Youth Festival ha Umwang

Nongpoh, Naiwieng 1: Hapdeng ka jingiphuh iphieng bad ka jingïashim bynta shitrhem jong ki paid Karbi na kylleng ka Meghalaya bad Assam, ka 34th Zonal Karbi Youth Festival, kaba la pynlong da ka Karbi Cultural Society, Meghalaya Zone, ha jingïatreilang bad ka All Meghalaya Karbi Association (AMKA), ka la poi noh sha kaba kut hadien ar sngi lynter ha Auditorium Hall jong ka AMKA, haka shnong Umwang.
Ïa ka prokram pynhap pyrda la pynlong ha ka 31 tarik Risaw, ha kaba u Bah Mayral Born Syiem, MLA ka Nongpoh Constituency, u la long kum u Kongsan. La sakhi lang ruh ïa ka jingdon u Surya Rongphar, MLA ka Bokajan bad Executive Member jong ka Karbi Anglong Autonomous Council (KAAC), uba peit ïa ka tnad Arts and Culture, ka Kong Rona Khymdeit, MDC ka Nongpoh, ki nongïalam jong ka AMKA bad Karbi Cultural Society, ki longsan mansan, ki nongïalam Raid bapher bapher bad kiwei ki riew rangbah.
Ka thong ba kongsan jong kane ka tamasa ka long ban pynkhlaiñ ïa ka jingïatylli bad jingïalong kawei hapdeng ki jaitbynriew Karbi kiba sah ha ki jaka bapher bapher, bad ha kajuh ka por ban pynneh pynsah bad pynim ïa ki riti dustur, kolshor bad ka pateng tynrai jong ka jaitbynriew Karbi.
Ha kane ka sngi, u Bah Mayral Born Syiem u la aiti ïa ka jingïarap pisa kaba T.1 lak sha ka Karbi Cultural Society, bad kumjuh ruh u la aiti ïa ka work order kaba T.25 lak lyngba ka Chief Minister’s Special Development Fund (CMSDF) ha ka wat kaba nyngkong, na ka bynta ban tei ïa ka Cultural Centre ha shnong Purdua.
Haba kren ha ka jingïalang, u Bah Mayral Born Syiem u la ai jingïaroh ïa ka Karbi Cultural Society, Meghalaya Zone, halor ka sienjam ba kila shim ban pynlong ïa kane ka lympung, kaba la wanrah ïa ka jingïakynduh lang jong ki samla bad ki paid Karbi na kylleng ki jaka. U la ong ba kane ka tamasa ka pyni ïa ka jingïatylli jong ka jaitbynriew Karbi ym tang hapoh ka jylla Meghalaya hynrei wat shabar jong ka jylla ruh, bad ka long ruh ka rynsan ban pyni ïa ka jingriewspah jong ka kolshor bad ki riti dustur tynrai jong ki.
Ha kaba kut, u la kyntu ïa baroh ki paid Karbi ba kin ïatylli, ïaieid bad burom markylliang, bad ban shim ïa ka jingkitkhlieh ban pynneh pynsah ïa ki riti dustur bad ka kolshor tynrai kiba labuh da ki longshwa manshwa, khnang ba kin ym duh noh hynrei kin dang im bad bteng ban ïaid sha ki pateng ban wan.