Shillong, Naiwieng 01: Ka Meghalaya ka la wanrah biang ïa ka jingïalehkai kaba tyngeh ban pynliem noh ïa ka Nagaland da 12 ron ha ka jingïakhun kaba saw jong ka ha ka Senior Women’s T20 Trophy 2026-27 plate group kaba la long ha ka sngi Saitjaiñ, ha Sovima, Nagaland.
Ka Nagaland ka la jop ïa ka jingkynting pisa (toss) bad aiti sha ka Meghalaya ba kan tied nyngkong. Ka la lah ban pynkut ïa ka pali tied jong ka Meghalaya da tang 90/7 haduh kaba kut ki 20 ober. Pynban ynda la dei sa ka pali ban beh ïa ka thong, ka Nagaland ka la shah pynkut noh da tang 78/5 haduh ba kut ki ober ba la mang.
Kane ka dei ka jingjop kaba lai jong ka Meghalaya ha ki saw tylli ki jingïalehkai bad ka khusnam Player of the Match kaba lai ïa ka kapten ka Debasmita Dutta.
Kiba la kham seisoh ha ka tied na ka bynta ka Meghalaya ki long ka Luiza Tamang (12 ron), Debasmita (33 ron naki 48 bolls (3x4s) bad ka Monica Lyngdoh Phawa (24 ron naki 28 bol (2x4s).
Katba saw naki san ngut ki nongkawang bol ba la pyndonkam jong ka Meghalaya ki la khur ym duna ïa ka shi wiket marwei marwei, ka Neha Hajong ka la khur 2/11, katba ka Ajima Sangma (1/8), Debasmita (1/20) bad ka Inda Kharwanniang (1/21) ki la pynhap mar iwei.
Ka Meghalaya kan ïakhun ïa ka jingïalehkai ba khatduh jong ka group pyrshah ïa ka Mizoram ha kane ka sngi Nyngkong.
