Pdiang burom P. A. Sangma International Medical College & Hospital ïa ki samla pule doktor thymmai

Nongpoh, Risaw 29: Ka P.A. Sangma International Medical College & Hospital (PIMC), kaba dei kawei na ki skulbah ba hap hapoh ka University of Science & Technology Meghalaya (USTM), mynta ka sngi ka la pynlong ïa ka prokram pdiang burom ïa ka kynhun bathymmai jong ki samla pule MBBS ha Central Auditorium, ryngkat bad ka White Coat Ceremony bad ka jingïalang hapdeng ki kmie ki kpa bad ki nonghikai.
Ha kane ka prokram, u Dr. R. C. Deka, Director barim jong ka AIIMS, New Delhi, u la long kum u kongsan, katba u Dr. Hitesh Baruah, Managing Director jong ka Nemcare Superspeciality Hospital, Guwahati, u la long kum u symbud kongsan.
La sdang ïaka prokram da ka jingrah ïa ka lama, bud sa ka jingthung dieng ban pynshlur ïa ki samla pule ban don ka jingkitkhlieh kumno ban sumar bad pynneh pynsah ïa ka mariang.
La donlang ruh ha kane ka sngi da u Mahbubul Hoque, Chancellor jong ka USTM, bad u Prof. G. D. Sharma, Vice-Chancellor jong ka USTM, kiba la pynpaw ïa ka thong ban kyntiew ïa ka PIMC kum kawei na ki jaka pule bad jaka wad bñiah kaba paw haka thaiñ Shatei lam Mihngih haba ïadei bad ka koit ka khiah.
Ka jingpynkup ïa ki jaiñ lieh (White Coat Ceremony) ka la long ka bynta kaba kongsan tam jong kane ka prokram, ha kaba ki samla pule MBBS bathymmai ki la ïoh pdiang ïa ki jaiñ lieh kum ka dak jong ka jingsdang jong ki ban rung sha ka kam sumar briew bad hakajuh ka por ban shim ïaka jingbam smai ban sumar ïaki nongpang da ka jingkitkhlieh bad ka jingaiti lut haka kam kaba ki shakri.