Pynkhlaiñ shwa ïa ka seng lajong, pynphai nia u Bah Mayralborn ïa u President Congress

Shillong, Risaw 29 : U MLA ka BJP na Nongpoh, Bah Mayralborn Syiem ha ka sngi Palei u la pynpaw ba ki don ka jingsngew skhem ba ka BJP kan jop bun ki seat ha ka elekshon MLA jong u snem 2028. U la ong ruh ba ki nongthep vote kin ai ïa ka rai jong ki katkum ka jingtrei kam bad ka jingshakri jong ki nongmihkhmat ïa ki paidbah.
Da kaba pynphai nia halor ka jingkynthoh jong u President ka Congress, Bah Vincent H Pala ba baroh ki MLA ka UDP kiba la phet seng kin mad ïa kajuh ka apot kumba la mad da ki MLA ba leit sha ka Trinamool Congress (TMC), na ka liang u Bah Mayralborn u la ong ba man la ka elekshon ka long kaba eh bad kaba don ïa la ki jong ki jingeh.
“U MPCC President u dei ban pynkhlaiñ shwa ïa la ka jong ka seng bad ban lum biang ïa ki nongkyrshan jong ka, shwa ban kdew kti ïa kiwei,” u la ong da kaba pynshai artad ba um don jingatnud pyrshah ïa ka Congress lane ïa kano kano kawei pat ka seng saiñ pyrthei, bad ba u burom ïa baroh ki seng.
Shwa kane u la pynkynmaw ruh ba ha ka elekshon jong u snem 2018, u la jop kum u kyrtong ka Congress, katba ha ka elekshon 2023 u la ïakhun kum u kyrtong ka UDP. “Kumjuh, ha ka elekshon ban wan, ki paidbah kin bishar ïa ki kyrtong katkum ka jingtrei kam bad ka jingkitkhlieh kaba ki la pyni ha ka jingshakri ïa ka constituency,” u la ong.
Ha kaba ïadei bad ka jingkular halor ka jingtih dewïong, kaba la pynpaw shwa ka elekshon 2023 ba yn pynbeit hapoh 180 sngi, u Bah Syiem u la ong ba um shym la don bynta ha ki jingïakren bad ki nongïalam ka BJP ha katei ka por. Hynrei mynta, u la pynpaw ïa ka jingshaniah ba ka sorkar ba la ïalam da ka BJP kan shimkhia ïa katei ka mat.
U la ong ba lada katei ka jingkular kam urlong, kin sa shim ïa ka rai ha ka por kaba dei. “Ha ka saiñ pyrthei, ka por kan sa batai. Ym donkam ban ong ba ym don shuh ka lynti, namar ha ka saiñ pyrthei ki don bun ki lad,” u la ong.