Jowai, Risaw 28: Ka Hynñiewtrep National Youth Front (HNYF), kala pynlong ïa ka jingïalang ha shnong Mookhep, East Jaiñtia Hills, ha kaba la pynïasoh ïa ki rangbah sha ka seng kum ki dkhot ba thymmai.
Ha kane ka sngi, u Chairman ka HNYF Jaiñtia Hills, bah Pynbiang Rymbai, ula pynskhem ïaka jingpynïasnoh jong kine ki rangbah sha ka seng, ha ka jingïadonlang u President ka HNYF East Jaiñtia Hills u rangbah Satly Ryngkhlem.
Kane ka sienjam ka long ka dak jong ka jingkiew shaphrang bad ka jingpynkhlaiñ ïa ka seng ha East Jaiñtia Hills. Ka jingwan pynïasnoh jong kine ki rangbah ka pyni ïa ka jinglong kawei bad ka jingangnud ban ïatreilang na ka bynta ka bha ka miat jong ka jaitbynriew Hynñiewtrep.
Ka HNYF ka kyrmen ba kine ki dkhot ba thymmai kin long kiba kloi ban ïatreilang bad ki nongkitkam jong ka seng ha ki kam shakri paidbah, ban ïeng skhem na ka bynta ka hok jong ka jaitbynriew bad ban trei shitom na ka bynta ka lawei kaba kham bha.
Ka seng ka pdiang sngewbha ïa kine ki dkhot ba thymmai bad ka kyrmen ba ka jingïatreilang kan nang pynkhlaiñ ïa ka HNYF ha ka thaiñ East Jaiñtia Hills.
