Ym shym la don kano ka jingtrei ha Laban, pynshai ka secretary jong ka tnad Tourism

Shillong, Risaw 28: Ka tnad jngohkai pyrthei jong ka Jylla Meghalaya ka la pynshai ba ym shym la sdang satia kano kano ka jingtrei ban shna ïa ka lower terminal jong ka Shillong Ropeway Project kaba la thmu ha Laban, hadien shisngi ba ka Khasi Hills Autonomous District Council (KHADC) ka la khang ia ka ophis jong ka projek ha katei ka jaka.
Ka Commissioner bad Secretary ka tnad jngohkai pyrthei ka Kong R. M. Kurbah ka la ïathuh ha ki nongthoh khubor ba katei ka jaka ka dei ka jaka jong ka sorkar bad ïa katei ka jaka la pyndonkam kum ka ktem ba shipor na ka bynta ban leh ïa ki kam ba nyngkong.
“Ym shym la don kano kano ka jingshna haduh kine ki sngi.Ym shym la tih ïa ki 6 tylli ki paia lane ïa ka terminal”, ka la ong.
Ka Kong Kurbah ka la ong ba ïa kane ka ktem ne ka camp ba shipor la thaw ban pynsuk ïa ki kam ba nyngkong, kynthup ïa ka jingtest ïa ka khyndew, ka jingpynheh ïa ka surok bad ka jingpynmadan ia ka khyndew, ha kajuh ka por ban pynthikna ïa ka jingbud ryntih ïa ki kyndon ïada ïa ka mariang bad ka imlang sahlang kiba donkam na ka bynta kane ka projek, kaba la kyrshan da ka New Development Bank.
Halor ka jingkhang khyrdep ka KHADC ïa kane ka ophis jong kane ka projek ha ka sngi Ba-ar, ka Kong Kurbah ka la ong ba ka tnad ka la ujor sha Laban Police Station pyrshah ïa utei u riew shimet uba la shimti ban teh lakam ïa katei ka jaka. Ka la ong ba ka tnad kan shim ïa ki sienjam kiba donkam ban ioh biang ïa ka jaka.
Haba ai jingtip ba bniah halor ka jingïaid lynti jong ka projek, ka la ong ba ïa ka hukum treikam la ai sha u kontraktor ha ka 25 tarik u Nailur, u snem 2025.Ia ka no-objection certificate (NOC) na ka Dorbar ba dei peit la ïoh ha ka 4 tarik u Jymmang, 2026, bad u kontraktor u la applai Trading Lisence na ka District Council ha ka 18 tarik u Jymmang.
Ka rukom ai laisen ka kynthup ïa ka jingthoh jingtar kaba kham bniah, kynthup ïa ka jingaplai ban ioh ïa ka NOC ba la pyndap ha ka 16 tarik u Naitung, ka jingpyntip ba la ioh da u kontraktor ha ka 28 tarik u Naitung, bad ka show-cause notice ba la pynmih da ka District Council ha ka 27 tarik u Nailar.U Contractor u la jubab, katba ka NOC na ka Dorbar la ioh pdiang ha ka 28 tarik u Nailur
Ka kong Kurbah ka la pynskhem ba ka jingai laisen ka dang iaid shakhmat bad ba ka tnad ka la bud ryntih ïa ki kyndon ba la buh.Ka la pynpaw biang ba ym shym la don kano kano ka jingtei.
Halor ki jingsngewkhia halor ka jingïamir jingmut bad ki paidbah, ka la ong ba la ïamir jingmut na ki nongshim bynta ha u snem 2022. Ka la pynshai ba ka rukom treikam ka kynthup ïa ka jingïamir jingmut bad ki paidbah ym ka public hearing, kumba donkam na ka bynta ki katto katne kiwei pat ki projek pynroi.
Ka la kdew ruh ia ka presentation ha ka State Convention Centre, ha kaba ka sorkar ka la batai ïa ki bynta bapher bapher jong ka projek bad pynbeit ïa ki jingeh ba la pynpaw da ki nongdon bynta.
Haba jubab ïa ki jingsngewkhia halor ka jingktah jong ka ropeway ïa ki tyllong um, kynthup ïa ka jaka sawdong jong u Lum Shillong, ka Kong Kurbah ka la ong ba ïa kane ka mat la pynshai da ki bor ba dei peit.Ka la ong ba ka Lum Shillong ka jngai kumba 3.5 km na ka jaka ba shna ia ka projek bad ba ïa ki tower ba la tyrwa yn buh ha shilynter jong ka rynsan.