Shillong, Risaw 27 : Ka kynhun mareh thong jong ki pulit ki la ïoh ban khur haduh lai tylli ki takma ksiar, kawei ka takma rupa bad ar tylli ki takma rnong na ka lympung ïakob mareh thong ha Tawang, Arunachal Pradesh kaba la tip kum ka 4th Tawang Marathon ha ka 24tarik mynta u bnai.
Ha kane ka jingïakob mareh kaba long ha ka jaka ba kynjang bha kumba 10,000 phut na sla duriaw ki hynriew ngut ki nongmareh na ka tnad Pulit ka Jylla ki la pyni ïa ka jingtbit jong ki kaba la pynlong ruh ïa ka Director General of Police ka Jylla, Kong I Nongrang, IPS ban ai ka jingïaroh kaba khraw.
Kumta, ha kane ka sngi ka DGP ryngkat ka jingdonlang kiwei ki heh pulit ki la pynkup burom ïa kine ki nongmareh ha ka jingïalang kaba long ha Police Headquarter Shillong.
Kine ki nongjop kiba khur takma ksiar ki kynthup ïa u SI Kmenlang Dkhar, SB Organisation ha ka thup mareh ba 10 km jong kiba 40 snem shajrong, nangta u SO Badon Sing Tham na ka F&ES, Shillong na ka thup mareh ba 10 km ha ka thup marep kiba 50 snem shajrong, bad ka takma ksiar kaba lai ka wan na u Follower Hepstarly Lyngkhoi, EKH DEF na ka thup mareh ba 10 km jong kiba 18 snem shajrong.
Ïa ka takma rupa pat la ïoh ban khur da ka WP-BNC Jidalin Tympuin, na ka 3rd MLP Bn kaba la aireng ha ka thup ba 10 km (Overall).
Bad ia ki artylli ki takma rnong pat la ïoh ban khur da ka WP-UBC Dakahi Kyndait, Ri-Bhoi DEF ha ka thup 42 km Full Marathon (Open Category, Female) bad ïa kawei pat ka rupa la ïoh da ka WP-SFC Nangkiewsuki Slong, SF-10 ha ka 21 km Half Marathon (jong kiba hapoh 30 snem ka rta)
Na ka liang ka tnad ha ka khubor kaba ki pyllait ha ki rynsan social media ki la ai ka jingkitbok ïa kane ka kynhun kaba la wanrah ka nam bad ka burom ym tang ïa ka tnad hynrei ïa ka jylla hi baroh kawei.
