Pynliem ka Mynnar Jirang SC ïa ka Patharkhmah ha ka phainal phutbol ka CoRP, rah ïa ka song pisa ba 1 lak

Nongpoh, Risaw 27: Ka lympung ïalehkai phutbol Open to All Knock-out Football Tournament bala pynlong da ka Confederation of Ri-Bhoi People, Ri-Bhoi Sepngi mynta ka sngi kala poi noh sha kaba kut hadien ka jingïakhun phainal hapdeng ka Patharkhmah SC pyrshah ïaka Mynnar Jirang SC ha madan ïalehkai ha Jirang.
Ïa kane ka lympung la wan ban pynhap pyrda noh da u Bah VGK Kynta u ba dei u kyrtong MP ka UDP kum u kongsan, u Bah Allantry Dkhar Vice President ka State UDP kum u symbud kongsan haka jingdonlang ki nongïalam ka CoRP Ri-Bhoi Sepngi naduh u Bah Sumar Lyngdoh President, ki nongïalam Hima, nongïalam shnong lem bad kiwei kiwei ki riew rangbah ryngkat ki hajar ngut ki paidbah kiba la wan ban sakhi ha kane ka sngi.
Haba phai sha ka jingïakhun phainal ha kane ka sngi kaba la long hapdeng ka Patharkhmah SC pyrshah ïaka Mynnar Jirang SC ka jingïalehkai kala long kaba itynnad bad ïakhaid bha kaba la pynshong shit ruh ïaki paidbah nongpeitkai kiba la wan ban sakhi ha kane ka sngi bad hapdeng ka jingïakhun kaba jur.
Ka Patharkhmah SC kala ioh ban pynkhih nyngkong ïaka jar hynrei tang khyndiat minit da ka jingtrei shitom ki rangïalehkai ka Mynnar Jirang SC kila ioh ban pynphai ïa katei ka shi kol bad haduh ba kut ka kylla miet ym shym don shuh ban ioh pynkhih ïaka jar ha kaba ka jingïakhun kala kut noh hapdeng ka jingïakhaid da 1-1 kol.
Hadien ka jingïakhaid naka liang ki bor pynïaid kila rai ban pynïashut noh da ka tie-breaker bad dei ha kane ka kynti ka Mynnar Jirang SC kala ioh ïaka kabu ban pynliem noh ïaka Patharkhmah SC da 5-4 kol bad rah syndon ïaka nam lahduh jong katei ka lympung.
Ka Mynnar Jirang SC kaba dei ka kynhun lahduh kala ioh ban rah ïaka song pisa kaba T.1 lakh lem bad ka trophy katba ka Patharkhmah SC kaba la rem noh haka jingïakhun phainal kala ioh ban rah ïaka song pisa kaba T. 50 hajar lem bad ka trophy ryngkat kiwei kiwei ki khusnam shimet bala sam ha katei ka sngi.