191,139 ngut ki nongthep vote ha 5 tylli ki Konstiwensi bun ki kynthei ban ïa ki shynrang

Nongpoh, Risaw 26: Ka ophis u Deputy Commissioner Ri-Bhoi District lyngba ka tnad Election mynta ka sngi ka la pynlait paidbah ïaka thup ba khatduh ne Final Publication jong ka Electoral Roll na ka bynta ki 5 tylli ki Assemblies Constituencies jong ka Ribhoi District kiba kynthup ïaka 8-Mawhati Assembly Constituency, 9-Nongpoh Assembly Constituency, 10-Jirang Assembly Constituency, 11-Umsning Assembly Constituency bad ka 12-Umroi Assembly Constituency.
Ïa katei ka jingpynlait paidbah ïaka thup ba khatduh jong ka Electoral Roll la pynlong ha Science Hall haka jingdonlang u Dr. Abhishek Saini Deputy Commissioner ka Ri-Bhoi, ka kong B Ranee Additional Deputy Commissioner, haka jingdonlang ki EROs, AEROs, BLOs bad ki nongmihkhmat naki seng saiñ Hima bapher bapher ka Ri-Bhoi.
Shuh shuh ha katei kajuh ka sngi sngi naka liang u DC lem bad kitei ki ophisar ki la ïoh ruh ban aiti syndon ïaki thup khatduh jong ki nongthep vote sha ki nongmihkhmat jong ki seng saiñ pyrthei kiba la wan ban ïadonlang ha katei ka jingïalang.
Haba phai sha ki nongthep vote ha haki 5 tylli ki Constituency ka Ri-Bhoi District ki nongthep vote ki don kumba 191,139 ngut ba kynthup 97,622 ngut ki kynthei bad 93,516 ngut ki shynrang bad ki kynthei ki tam beit ïaki shynrang ha manla ki constituency.
Haba phai sha ka jingdon ki nongthep vote haki constituency bapher bapher ka Ri-Bhoi, ka 8-Mawhati ka don 41,272 ngut, ka 9-Nongpoh ka don 38,852 ngut, ka 10-Jirang ka don 39,031 ngut, ka 11-Umsning ka don 39,307 ngut bad ka 12-Umroi ka don 32,677 ngut ki nongthep vote.
Naka liang u Dr Abhishek Saini haba kren ha kane ka sngi u la ong ba ka SIR ha Ri-Bhoi District kala long kaba jop ha kaba baroh kiba dei hok kim dei ban shah kyntaid bad baroh ki bym dei hok kim dei ban shah kynthup haka thup ki nongthep vote. Naka liang u DC u la pynpaw ka jingsngewkmen hadien bala lah ban pyndep ïaka thok kumba la buh por.
U la ong ruh ba shuwa ka Special Intensive Revision ki nongthep vote ki don kumba 205,734 ngut bad hadien bala dep ïaka SIR ka jingdon ki nongthep vote kala hiar sha ka 191,139 ngut namar ki don kiba la khlad noh, kila kynriah jaka bad kiwei kiwei ki daw.
Shuh shuh naka liang u DC ka Ri-Bhoi u la ai khublei ïa baroh ki ophisar bad baroh kiba la don bynta ban trei shitom naduh kaba sdang ban leit sha ki shnong ki thaw ban pynthikna ba uwei ruh u nongshong shnong u ba dei hok ban ioh ïaka hok thep vote um dei ban shah kyntaid.