Nongpoh, Risaw 24: Ka Meghalaya Weightlifting Association mynta ka sngi, ka la pynlong ïa ka lympung ïakop rah nar jong ki samla kynthei, kaba la tip kum ka ASMITA Weightlifting League 2026, ha madan ïalehkai jong ka Auxilium Higher Secondary School, Mawtnum, Ri-Bhoi District, da ka thong ban kyntiew ïa ka sap, ka jingtbit bad ka bynta jong ki samla kynthei ha ka jingïalehkai rah nar.
Ha kane ka lympung, la wan shim bynta da ki thei ïalehkai rah nar na kylleng ka jylla Meghalaya, kiba la ïakhun tyngeh ban pyni ïa la ka sap, ka bor bad ka jingtbit lyngba ki jingïakop kiba la pynlong ha ki ar bynta, kata ka Snatch bad ka Clean and Jerk ha kaba ki nongïashim bynta ki la ïakhun ban khur ïa ki takma ha ki kyrdan bapher bapher.
Ha kane ka sngi, la don lang u Bah Mewaker Lyngdoh Pakma, President ka Bharatiya Janata Yuva Morcha (BJYM), ryngkat bad u Bah Danial Khonglah, General Secretary ka BJYM, u Bah Donald Rambai, President ka Meghalaya Weightlifting Association, lem bad kiwei pat ki riew rangbah bad ki nongïalam.
Ha kaba kut jong ka lympung, ki nongpynïaid ki la sam ïa ki takma sha ki nongjop ha ki kyrdan bapher bapher, kum ka dak jong ka jingithuh ïa ka jinglah, ka jingtrei shitom bad ka jingtbit jong ki thei ïalehkai ha kane ka jingïakop.
Katkum ka jingpyntip jong ki nongpynïaid, ki nongjop ha kane ka lympung kin ïoh ïa ka kabu ban mihkhmat ïa ka jylla Meghalaya ha ka East Zone ASMITA Weightlifting League 2026, kaba la buh ban pynlong ha ka jylla Bihar.
