Mawkyrwat, Risaw 20: Ka Mawlangwir Sports Club, ha ka 17 tarik u Risaw, 2026, ka la pyllait ïa ki jersey thymmai ha shwa ba kan ïa shim bynta ha ka Super Division Football League 2026-27 ban pynlong da ka Mawkyrwat District Sports Association. Ïa kane ka prokram la pynlong hapoh Pine Home Mawlangwir, Saitsnad, Mawlangwir, South West Khasi Hills District.
La pynïaid ïa kane ka prokram da u bah P. Lyngdoh Marshilong bad la ïa don ryngkat ruh u bah Seibor Sana (Coach, Shillong Lajong FC), u Dr. O. Jyrwa, u bah N.S. Wanniang (Myntri Shnong, Mawlangwir) bad kumjuh ruh u bah C. Sohshang (Co-chairman, MSDRC, Government of Meghalaya) kum ki kongsan.
Kum ki kongsan, ki la ai mynsiem ïa ki ‘rangïalehkai ka Mawlangwir Sports Club ba kin long kiba don ïa ka jinglong ryntih, ka jingsngewrit, ka jingïalong kawei bad ruh ka jingtrei shitom haba ki pynkhreh na ka bynta ka tei ka aïom ïalehkai ban wan khnang ba ki ïoh ban kiew shaphrang ha ka kam ïalehkai jong ki bad ban wan rah ruh ka burom ïa ka sports club bad ka shnong hi baroh kawei.
Ki la ban jur ruh halor ka jingdonkam jong ka jingkyrshan ba radbah jong ki paid nongshong shnong jong ka shnong Mawlangwir hi baroh kawei khnang ba yn lah ban kyntiew shajrong ïa ka sports club. Ki la ai ruh ka jingkyrkhu kyrdoh ïa ka Mawlangwir Sports Club bad ka jingkitbok kitrwiang ba kan lah ban ïai kiew shaphrang ha ki kam ïalehkai.
Ha kaba ïadei bad ki jersey ba thymmai, la kyrshan da ka Pine Home Mawlangwir, ka Wissilian Ink Mawlangwir bad ka Jford Arena, kiba la ïa don ryngkat ruh ha ka tei ka sngi. Ki la pynpaw ruh ïa ka jingangnud ban noh synñiang sha ka club kum ka jingai mynsiem na ka bynta jong ka.
Ka Mawlangwir Sports Club, namarkata, ka pynpaw ka jingsngewnguh eh ïa ki namar ka jingkyrshan ba kordor jong ki ïa ka club.
Ha kane ka sngi, la ïoh ruh ïa ka jingïadon ryngkat jong ka Dorbar Shnong Mawlangwir, ka Seng Kynthei Shnong Mawlangwir, ka Seng Samla Shnong Mawlangwir, ka VDP Mawlangwir, ka Mawlangwir VWSC, ki rangbah jong ki Dorbar Dong, ki tnad treikam ba pher ba pher jong ka sports club bad kumjuh ruh ki ‘rangïalehkai phutbol jong ka Mawlangwir Sports Club bad kiwei de.
Shuh shuh, ha kane ka sngi la ïoh ruh ban lehburom bad ai jingkyrshan na ka bynta i samla Dalaakor Wanniang iba la shah jied na ka bynta ka jingai jinghikai ha ka jingïakop jngi ha Guwahati na ka bynta ka National Games.
