Ka thong ka long ba ha baroh ki jaka don ki jaka bret ñiut katkum ka juk stad ba mynta : Dy CM

Shillong, Risaw 02 : U Symbud Myntri Rangbah ka Jylla, Bah Sniawbhalang ha ka sngi Thohdieng u la ong, ba ki jaka kum ka Jowai, Tura bad Nongpoh ki dei napdeng ki jaka ba la pyrkhat ne ithuh ban don ïa ki jaka bret ñiut kiba paka.
“Ka jingthmu ka long ban pynthikna ba ki sor rit bad ki sor ha kylleng ka Meghalaya kin don ïa ki jaka bret ñiut katkum ka juk mynta ha kine ki snem ban wan,” ong u Symbud Myntri Rangbah haba kren ha ka jingïalang plie paidbah ïa ka prokram pynkhuid shnong paidbah kaba sdang naduh Nongpoh bad kut pat haduh Sohra ïa kaba la pynlong da ka Directorate of Urban Affairs hapoh ka Swachh Bharat Mission kum shi bynta jong ka prokram pynkhuid ïa ka ri baroh kawei, ka Swachhata Hi Seva 2026.
Symbud Myntri Rangbah u la kyntu ruh ïa ki paidbah ban ïa synran bad ïatreilang ha kaba buh ïa kine ki jaka, namar ba teng teng ki briew ki pyrshah ïa kine ki projek namar ka jingbym sngewthuh ïa ka jingmyntoi jong ki.
Nalor kata, u la ong ba ka sorkar ka dang wad ruh ïa ki lad ban pynïasoh ïa ki kam jong ki tnad sorkar bapher bapher bad ki skhim, kynthup ïa ki prokram pynroi nongkyndong, ban kyrshan ïa ka jingtei ïa ki jaka pynïaid kam ïa ki ñiut ha ki shnong kiba heh bad ban pynthikna ba ki shnong kin don ïa ki rukom ba la buh kyrpang na ka bynta ban lum bad bret ïa ki ñiut.
Haba kyntu ïa ki paidbah ban shim ïa ka jingkitkhlieh, u la ong, “Kane ka dei ka surok jong ngi, kane ka dei ka shnong jong ngi, kane ka dei ka sor jong ngi, kane ka dei ka Jylla jong ngi.” U la kyntu ïa ki paidbah ban don ka jingsngew trai ïa ki jaka jong ki.
U la bynrap ba ka sorkar kan pynkhlaiñ shuh shuh ïa ki kam pynkhuid ha ki skul lyngba ka jingïatreilang bad ki principal, ki rangbah shnong bad ki paidbah, khnang ban pynlong ïa ka rukom lum bad bret ñiut kaba dei.
Haba kdew ba ka Meghalaya ka la kylla long kawei na ki jylla ba ki nongwan jngohkai pyrthei ki ju leit jngoh, u Symbud Myntri Rangbah u la ong ba ka long kaba donkam ban sumar ïa ka mariang bad ki jaka paidbah khnang ban pynneh ïa ka nam jong ka jylla kum ka jaka jngohkai pyrthei.