Shillong, Nailur 28 : U MLA ka BJP na Nongpoh u bah Mayralborn Syiem ha ka Lah Sngi U Blei u la ong ka jingkylla ka suiñbneng, ka tei jingtei kulmar khlem da bishar bniah kaba la ktah bad pynthut ïa ki wahduid bad nala ka long kawei na ki daw jongka jingshlei um ha Ri Bhoi bad wat ha kiwei kiwei ki bynta ka jylla.
Haba kren sha ki lad pathai khubor u bah Syiem u la ong ka jinglong ka suiñbneng ha kine ki ar lai snem ka la kylla bha bad kane ka jingkylla ka mariang bad kine ki jingtei kulmar ïa ki jingtei khlem da bishar bniah lypa ki dei ki daw bah jongka jingshlei um.
“ Kine ki jingtih khyndew kulmar bad bret khyndew kulmar, ha ki por ba mynshwa ki wahduid ki dang heh kumba 15 phut ei ei hynrei da ka jingïai kiew ka jingbun briew bad tei ïing kulmar harud ki wahduid bad nala khamtam kum ki Complex kiba heh baheh ki la pynrit ïa ki wahduid bad nala kiba heh eh mynta ruh sa tang 7 phut. Kumta shano ka um kan tuid. Ka hap ban wad ïa ka lynti ïaid bad khatduh poi tuid shaduh ïing shetja ruh namar ym don jaka da kumwei pat” ong u bah Mayralborn.
Une u MLA ka BJP u la ong ba u la don ka jingïakynduh bad ka tnad Water Resources, PWD, Urban Affairs ban peit bniah ïa kine ki jingjia kiba ju jia ha Byrnihat, Jorabat bad Nongpoh.
“ Kine ki dang dei ki nongbah rit ha kaba hap ban pynleit jingmut ha ki nala bad ki wahduid wat lynter ka surok bah ruh. Ka nala ba la tei na shilliang sha shilliang ka surok ha u 2010 ka lah ban sahkut noh hadien 15 snem kumta ka um kam ïoh tuid bha shuh kumba long ha kaba sdang bad da ka jinglang ki jaboh jabaiñ, ki synrum synreh ba bret da ki briew ba shong ba sah shajan ki nala ne ki dukan ka sa wanrah ïa kane ka jingshlei um” ong biang u bah Syiem.
U la ong “Kumba long mynta ka jingshlei um kam dei shuh tang ha Assam ne Meghalaya. “ Kane ka jingshlei um kam dei shuh tang ha Jorabat, Nongpoh, Shillong, hynrei ka jia ha Guwahati, Bangalore, Delhi bad ka la dei ka mat kaba la mad jingeh da baroh”
Kumno ban weng ïa kane ka jingeh u la ong “ Ngi hap ban ïa phyrkhat lang. Donkam ban wanrah da ki kynja polisi, donkam ban wanrah ïa ki riew shemphang bad baroh ki tnad sorkar ki dei ban ïatrei lang ban weng ïa kane ka jingeh”.
