Shillong, Nailur 28: U Bah Michael N. Syiem convenor jong ka Maitshaphrang Movement u kyrpad ïa ka Meghalaya State Commission for Women ban ïarap ban pyntreikam ïa ka Meghalaya Compulsory Registration of Marriage Act kaba la pass da ka ïing dorbar thaw aiñ ka jylla ha u snem 2012.
Haba kren ha ki lad pathai khubor mynta ka sngi 28/Nailur/2026 ha Shillong Press Club, u nongkhot ïa ka Maitshaphrang Movement balei ka seng ka kyrpad ïa ka Commission ka long ba ka sorkar kan pyntreikam ïa ka Meghalaya Compulsory Registration of Marriage Act 2012 dei ma ki kiba la kyrpad ïa ka sorkar ha u snem 2012 ban shna ia kane ka aiñ.
U bah Micheal u la ong ba ha kane ka aiñ ka don ka bynta, kino kino ki kam kiba don ka jingïadei bad ka sorkar ki hap ban pyni ïa ka syrnod ba ki la ïathoh na ka bynta kino kino ki kam kiba ïadei bad ka sorkar bad ha kane kajuh ka aiñ ha ka kyndon kaba lai ka la thoh shai biang haba ïadei bad kano kano ka kam sorkar hap ban ai ïa ka syrnod ïathoh shongkurim.
Ha u snem 2016 ka seng ka la pan ïa ka RTI sha baroh ki tnad sorkar ban lap katno tylli ki tnad sorkar ki pyntreikam ïa kane ka aiñ bad ka jubab kaba ki ïoh kam shym don kawei ruh ka department kaba pyntrei kam ïa kane ka ain namar kam don ka jingpynshai ka mut aiu kata haba don kino kino bad ki kam sorkar bad ka ain ka khlem pynshai hi ruh.
Ka sorkar ha u snem 2022 kala wanrah ia ka jingpynkylla ia kane ka ain ban weng noh ïa ka jingmut bad ia ka kyndon kaba lai na ka ain ban ong ba donkam ban ai ia ka syrnod iathoh na ka bynta baroh ki kam sorkar, kane ka ain kala long satang ha ka kot ka bym treikam namar ia kine ki kyndon la weng noh haba la pynkylla ïa ka.
La ïathuh ba mynta ka sngi kila wan ban ïa kynduh ia ka Commission ba kan iakren bad ka sorkar ba kan pynshai ka mut aiu kane kaba ki ong ka Official Purpose bad ka sorkar ka dei ban pynshai ban pyndonkam ia ka syrnod iathoh shongkurim na ka bynta kita kita ki kam namar ba la jur palat ka jingïashongkha hi bad haba don ka jingïakhlad ka shitom ba kin ioh ïa ka jingïarap.
Ka Ain ha ka 2012 ka la shu treikam tang ha ka kot bad kane ka official purpose bad la khmih lynti ba ka commission ka dei ban shim khia halor kane ka bynta naba bun na ki kam haba leit shabar ki hap donkam ia ka syrnot ne ki kot ki sla ban pyni ia ka jingshongkha shongman.
