Wat tieng ban leit phah ne jingtest halor ka HIV/AIDS bad Cancer kyntu u Chairman MSHAB ïa ki paidbah ka jylla

Shillong, Nailur 28: U Chairman jong ka Meghalaya State Health Advisory Board, Bah Mayralborn Syiem, u la pynpaw ïa ka jingsngewkhia halor ka jinglong jingman jong ka HIV/AIDS bad cancer ha Meghalaya, da kaba kyntu ïa ki paidbah ban wan shakhmat ban leit test bad ïoh ïa ka jingsumar kaba kloi lada lap ba ki don ïa kine ki jingpang.
Haba kren halor ka jingkiew jong ka HIV/AIDS ha ka Jylla, u Bah Mayral uba dei ruh ha kajuh kapor u MLA jong ka Nongpoh constituency u la ong ba ka jinglong jingman ka long kaba donkam ban shimkhia namar, katkum ki jingkheiñ kiba paw, ka Meghalaya ka don ïa ki jingkhein kiba kham bun wat ban ïa ka national average.
Haba kren bad ki lad pathai khubor, u Bah Mayral u la kyntu ïa ki paidbah ba kim dei ban sheptieng ban leit test, hynrei ban shim ïa ka sienjam ban tip ïa ka jinglong jingman jong ka koit ka khiah jong ki.
“Ngi dei ban wan shakhmat ban leit test bad ban ïoh jingsumar. Kim dei ban sheptieng namar ka tnad ka koit ka khiah jong ka Sorkar ka don ban ïarap bad ban peit ba kane ka jingkheiñ kan hiar,” u la ong.
U la ong ruh ba ka jingsngewkhia ka kham jur ha ki katto katne ki distrik, kynthup ïa East Khasi Hills, East Jaintia Hills bad Ri-Bhoi, bad ka donkam ïa ka jingïatreilang hapdeng ka Sorkar bad ki paidbah ban ïakhun pyrshah ïa ka HIV/AIDS.
Haba kren shaphang ka cancer, u Bah Mayralborn u la ong ba kane ka long ruh kawei na ki jingpang kiba paidbah ki dang ïakynduh bha ha kine ki sngi.
Katkum ki jingkheiñ ba u la kdew, ha ka liang jong ka jingkhlad na ka daw jong ka cancer, Meghalaya ka don ha ka kyrdan kaba ar ha ri ha ki shynrang, katba ha ki kynthei ka don ha ka kyrdan kaba 11.
U la ong ba kawei na ki jingeh ka long ba bun ki briew kim shimkhia ïa ki dak kiba sdang mih jong ka jingpang bad ki ju shim sting ïa ki dak jingshitom kiba paw ha ka met jong ki.
Namarkata, u la kyntu ïa ki paidbah ban leit check-up bad test ïa ka cancer ha ka por kaba biang, khnang ba lada lap ïa ka jingpang ha kaba sdang, yn lah ban shim ïa ki sienjam kiba donkam.
U la pyntip ruh ba ka Meghalaya State Cancer Society ka dang pynlong ïa ki jingtest ha ki bynta bapher bapher jong ka Jylla. U la pyntip ruh ba ha Ri-Bhoi, hadien ba la pynlong ïakum kine ki prokram ha Madan Pahamsyiem, yn sa pynlong ruh ha Umsning, Bhoirymbong, Mawhati, Patharkhmah, Byrnihat bad kiwei pat ki jaka.
Katkum ka jingong jong u, ha kine ki prokram, ki paidbah nongshong shnong kin ïoh lad ban leit test bad kin ïoh ruh ïa ka jingbatai na ki doktor bad ki specialist halor ka jinglong jingman jong ka koit ka khiah jong ki.
U Bah Mayralborn u la pynpaw ba ka jingïashim bynta jong ki paidbah ka long kaba donkam bha ban pynhiar ïa ka jingdon kiba ïoh ïa ka HIV/AIDS bad cancer ha ka Jylla.