Bthah ka Estimate Committee ïa ka tnad Labour ban wad lad bad soi MOU bad ki Agency halor ki lad aikam

Shillong, Nailur 28: Ki samla hadien ba ki la pyndep ïa ki jinghikai ha ki Industrial Training Institutes (ITI) bapher bapher jong ka jylla ki dei ban ïoh ïa ki lad ïohkam ïohjam ha ki tnad ne ki kompeni bapher bapher lyngba ka soskular ba ka tnad Labour ka ïateh, ong ka Estimate Committee jong ka Iing Dorbar Thawain ka Jylla.
Ïa kane la pynpaw da u Chairman jong ka Estimate Committee, Bah Mayralborn Siem haba kren bad ki lad pathai khubor hadien ka jingïalang bishar kam ïa ka rukom treikam ki ITI ha Shillong, Tura, Jowai, Williamnagar, Nongpoh, Ampati, Khliehriat, Mawkyrwat bad kiwei pat ki jaka ha ka Jylla.
Haba kren hadien ka jingïalang bad ka Labour Department, u Bah Mayralborn u la ong ba ka mat kaba kongsan hadien ba ki samla ki la pyndep ïa ka jinghikai ha ITI ka long ka jingpynïoh kam.
U la ong ba ka Committee ka la bthah ïa ka Labour Department ban wad ïa ka lad ban ïasoi ïa ki Memorandum of Understanding (MoU) bad ki agency bapher bapher, khnang ban pyntikna ba ynda ki samla ki la pyndep ïa ka jinghikai na kitei ki ITI kin ïoh pat ïa ki lad ïohkam ha ki kompeni lane ki tnad bapher bapher.
“Hadien ba ki samla ki rung ha ki ITI bad ki pass, ka mat kaba kongsan ka dei ka lad ïohkam. Ngi la bthah ïa ka Labour Department ban wad ïa ka lad ban ïasoi ïa ki MoU bad ki agency bapher bapher na bynta ki lad ïohkam,” u la ong.
U Chairman u la ong ruh ba ka Committee ka kwah ba ki lad aikam (placement) ïa ki samla ba pass na ITI kan long ka mat kaba hakhmat eh, khnang ba ka jinghikai ba ki samla ki ïoh kan ïasoh beit bad ka lad ïoh kam.
Haba kylli halor ka bynta jong ki ITI ban ïakhun ïa ka jingbym donkam, u Bah Mayralborn u la ong ba ym lah ban shaniah tang ha kawei ka tnad ne kawei ka lad ban weng ïa kane ka jingeh.
U la ong ba ka jingwanrah ïa ka jingïarap pisa na shabar ban seng ïa ki karkhana bapher bapher lane ki kompeni jong ki riewshimet ka don ka bynta kaba khraw ban pynmih ïa ki lad kam kiba thymmai.
Ha kajuh ka por, u la kdew ïa ki prokram jong ka Sorkar Jylla kum ka CM-Elevate bad PRIME, kiba ai jingïarap ïa ki nongseng kam lajong kum ki sienjam kiba ïadon bynta bad ka jingpynmih ïa ki lad ai kam.
U la ong ba ka jingïatreilang jong ki tnad sorkar bapher bapher, ka jingpynïoh ïa ki lad ai kam na ki ITI, ka jingïarap ïa ki nongseng kam lajong bad ka jingwan jong ki karkhana kin long ki bynta kiba ïatreilang ban ïakhun ïa ka jingkyrduh kam ha ka Jylla.