Ngam dei u ba heh ka tyngam, Nga pyni beit da ki kam, ïeng ka Lumparing UPHC: Sanbor

Shillong, Nailur 26: Ka la long shisha ka jingkyrkhu ba khraw na ka bynta ki paidbah kiba hap hapoh jong ka Rait Laban hadien ba u Bah Sanbor Shullai uba dei u Myntri Sorkar ha ka sngi Saitjain u la plie paidbah ïa ka Urban Primary Health Centre ha ka shnong Lumparing.
Kane ka hospital kaba don shiphew jingthiah bad ruh ka karma kha khyllung la plie da ka jingsakhi lang ki Rangbah Shnong na ki phra tylli ki dorbar shnong kiba don hapoh ka Riat Laban ha ryngkat lang ka jingsakhi lang ki paidbah nong shong shnong.
Ïa u Bah Sanbor la synrlang da ka Dr Neela Kharsohnoh bad ki heh ophisar ka tnad ka koit ka khiah.Ia kane ka hospital la sdang ban jurip naduh u snem 2021 bad hadien kata la bud pat sa ka jingpyndep ia ki kyndon jong ka tnad ka koit ka khiah tad haduh ban da pyndep.
Ha kane ka sngi u Bah Sanbor u la pynkup burom ruh ïa ki ASHA bad ki nongtrei ka tnad ka koit ka khiah kiba la ai ka jingshakri la bun bun snem hapoh jong ka shnong Lumparing.
Ka jinglut jingsep ha ka jingtei ïa kane ka Lumparing UPHC ka long T. 5 klur duna bad ha kane ka Hospital un don ar ngut Doctor, ki nurse nalor kiwei kiwei pat.
Ka Dr Neela Kharsohnoh haba kren kum ka symbud kongsan kala ai khublei ïa u Bah Sanbor halor ka jinglah ban buddien ia ka kam naduh kaba sdang haduh ban da ioh plie mynta ka sngi.
Ka Dr kala ai khublei ruh ïa ka jingshim khia jong u Bah Sanbor met bad mynsiem na ka bynta kane ka hospital bad ka long shisha ka burom bakhraw ïa ki paidbah jong ka Constituency kiba la jied ïa u Bah Sanbor uba la leh shibun ki kam ba khraw hapoh ka constituency.
U Bah Sanbor haba kren u la ong ba ki paidbah kiba shong hapoh ka shnong Lumparing kumba 63 percent kidei ki briew kiba duk bad kane ka hospital kala long ka jingkyrkhu ïa ki bad ïa ki nong shong shnong baroh kawei.
Halor ka jingurlong kane ka jaka ai jingsumar u Bah Sanbor Shullai la ai khublei ïa baroh ki ophisar kiba la ïa donkti lang ban pynurlong ïa kane ka kam, kynthup lang ruh ïa u myntri sorkar barim u ba peit ïa ka tnad ka koit ka khiah u James K Sangma.
Kane ka jaka ai jingsumar kan pynsuk ruh ïa ki longkmie ki ban wan kha khyllung ha kane ka jaka bad kila lait ban leit shuduh Ganesh Das Hospital namar ba la don ha hospital ha shnong lajong, ong u Bah Sanbor.
Halor ka jingurlong kane ka UPHC u Bah Sanbor u la ai khublei ïa u Myntri Rangbah ka jylla u Conrad K Sangna bad kumjuh ruh ïa ki ar ngut ki symbud myntri rangbah kata u Bah Prestone Tynsong bad u Bah Sniawbhalang Dhar.