Shillong, Nailur 26 : U National Vice President ka NPP bad Symbud Myntri Rangbah u Bah Sniawbhalang Dhar ha ka sngi Thohdieng ula kyntait ïa ki jingkynnoh ba u don jingthmu ban leit ïasoh sha ka BJP, haba pynpaw ba u dei jong ka NPP bad ban ïai neh beit haduh ba kut bad ka NPP.
Haba kylli halor ki khubor hamsaia ba un kynthih sha ka BJP hadien ba leit pynïasoh ki 8 ngut ki MLA ka UDP, u Bah Sniawbha ula ong “Em, phi ïohi, katto katne kila khot ïa nga shimet bad khroh ïa nga shimet bad kam don ka jingleh bakla lada ki khot ïa nga, ki kwah ban pynshisha na ngi hi, hynrei nga kwah ban pynthikna sha phi ba ngan ïai neh beit bad ka NPP jong nga”.
U Bah Sniawbha ula ong ba um lah ban shet kylla ïa ka rai ba la ai ha u da ki paidbah ka Nartiang bad ka Jylla Meghalaya.
“Nga hap ban burom ïa ki briew jong nga khamtam na ka constituency jong nga, kila jied ïa nga na ka NPP bad ngan kren hok, Nga dei jong ka NPP bad ngan ïai neh bad ka NPP. Ka jingkylli ban kyntiap sha kiwei pat ki party kam mih satia. Ngam lah ban shet kylla ïa ki paidbah ka Nartiang bad ka Jylla” ula ong.
“Lada nga ïakhun ia ka elekshon na kane ka party, nga hap ban ïai neh bad kane ka party. Kane ka dei ka nongrim jong nga” ong u Bah Sniawbha.
