Shillong, Nailur 25 : Ka jingïasoh jong 8 ngut ki MLA jong ka United Democratic Party (UDP) bad ka Bharatiya Janata Party (BJP) mynta ka don hapoh ka jingbishar jong u Lamphang ka ïing Dorbar Thawainñ ka Jylla.
Haba kren bad ki lad pathai khubor, u Adviser jong ka Meghalaya Legislative Assembly, u Bah Andrew Simons, ha ka sngi Thohdieng u la pynthikna ba la dep phah ïa baroh ki kot kiba donkam.
“Baroh 8 ngut ki MLA UDP kiba dang shen ki la ïasoh bad ka BJP, ki la dep phah ïa ki kot jong ki. U President jong ka party bad u bah Sanbor Shullai kum u nongïalam jong ka legislature party ki la phah ïa ka shithi sha u Lamphang ban pyntip shaphang ka jingïasoh bad ka BJP,” ong u Bah Simons u la ong.
Haba pynshai ïa ka jinglong jong kane ka jingjia saiñpyrthei, u la ong, “Hooid, kane ka dei ka jingwan pynïasoh. Ngi tip shai ba kane ka dei ka jingpynïasoh bad ka BJP. Ki la dep phah ïa baroh ki kot kiba donkam bad yn pynïaid ïa ki katkum ka rukom treikam. U Lamphang un bishar ïa kane bad yn pynlong ïa baroh ki jingbishar kiba donkam, bad u Lamphang un sa pynmih ïa ka rai katkum ka jingbishar jong u.”
Haba kylli shaphang u MLA jong ka Nongpoh, u Mayralborn Syiem, uba ym shym la don ha ka por ba la phah ïa ki kot, u Bah Simons u la ong ba la dep phah ïa ki kot jong u.
“Ki kot jong u ki don hangne. La pyntip ïa nga ba u don kiwei pat ki kam ban pyndep, hynrei u la dep phah ïa baroh ki kot jong u mynta ka sngi,” u la ong.
U Bah Andrew u la ong shuh shuh ba u Lamphang un sa shim rai hadien ba u la peit bniah ïa baroh ki mat kiba la kdew ha ka shithi.
“Kata ka dei kawei na ki mat kiba hap ban bishar, kumta ngim lah ban kren ei ei mynta. Ki la dep phah ïa baroh ki kot jong ki bad ngi hap ban peit bniah ïa baroh ki mat kiba ki la kdew ha ka shithi jong ki. Hadien kata, u Speaker un shim ïa ka rai,” u la bynrap.
