Nongstoiñ, Nailur 24: Ka Sorkar Jylla ka la bthah ïa ki Wholesaler ka West Khasi Hills District, ba kin leit kit hi dalade ïa u khaw rashon na ka kudam ka Food Corporation of Indïa (FCI) na Shillong tad haduh ban da pynbeit pat da kumwei.
Kane ka jingbthah na ka liang ka sorkar ka la mih hadien ka jingduh khaw rashon ki paidbah ka Nongstoiñ bad West Khasi Hills baroh kawei, kata la kumba ar bnai ei ei tang namar ka jingïakajia hapdeng ka shnong Pyndengrei Nongstoiñ bad ka Ophis ka FCI.
Halor kane ka bynta na ka liang u Myntri ka Tnad Food & Civil Supply & Consumer Affairs Bah Methodius Dkhar, u la pyntip paidbah ha ka jingïakren bad ki lad pathai khubor ha ka sngi Palei ha DC ophis Nongstoiñ.
U Myntri u la pyntip ba ïa ka bai kit ïa kine ki marbam, ka Sorkar kan pyrshang ban ïarap katto katne ïa ka jinglut ban pynsting ïa ki wholesaler. Hynrei kaba bun hi kin hap ban kit khlieh dalade ban lah pynpoi ïa ki marbam rashon sha u paidbah tad haduh ban da pynbeit da kumwei.
Nalor nangta, u la ïathuh ba ka FCI ha Nongstoiñ ka dei ka kudam kaba ki Wholesaler ka Eastern West Khasi Hills bad South West Khasi Hills ki ju wan kit ïa u khaw, hynrei mynta kine ki wholesaler baroh ki la mynjur ban leit kit noh sha Shillong.
U ka ong ruh ba wat na ka liang ki Wholesaler ka West Khasi Hills ruh kumba long mynta, ki la mynjur ban leit kit noh ïa u khaw na Shillong ban lah sam noh ïa u khaw marbam sha ki paidbah.
Ha kawei pat ka bynta jong ka khubor, na ka liang u Myntri ha ryngkat ka Hema Nayak Deputy Commissioner ka West Khasi Hills District, lem bad ki ophisar ka tnad bording MePDCL, MNRDA bad na ka Swacch Bharat Mission, ki la ïashong ban ïathir jingmut haba ïadei bad ka jingduh bording jingshai kaba khah khah ha ka thaiñ West Khasi Hills District.
Halor kane ka bynta u Bah Methodius Dkhar haba ai jingkren sha ki lad pathai khubor, u la ïathuh ba u la ïoh ïa ki jingujor na ki paidbah ka thaiñ ba ka jingduh bording jingshai kaba la jia khah khah ha man la ki sngi.
U la ong ba kane ka la ktah shikatdei eh ïa u ba bun balang, hynrei la lap ba ka dei halor ka nongrim ba ki nongtrei ha kane ka tnad ne kiba trei ïa kane ka kam, ki hap ban pynlip shuwa ïa ka mashin, namar ki don ki bynta kiba ki dang shna.
U la ong ruh ba don ruh ki katto katne ki shnong kiba dang ïoh bording thymmai, kumta tang haduh katto katne por kan dang ïai jia kumjuh. Kumta na ka liang jong u, u kyrpad ïa ki paidbah ba kin ïaishah shipor tad haduh ban da ïoh pyndep ïa ki kam kiba dang sah.
