Kylla pisa ki ñiut ki ñier na lyngkha lyngba ka vermicompost ha South West Garo Hills

Shillong, Nailur 24 : Ki nongrep ha South West Garo Hills ki la sdang ban pynkylla ïa ki ñiut ki ñier kiba mih na lyngkha ban pynkylla pat ïa ki sha ka spah lane ki sboh ba pynmih lyngba ka vermicomposting.
Ha Bolsak Dobokgre, hapoh Betasing C&RD Block, u nongrep ba tip kyrteng kum u Nangman Marak u pynmih kumba 1.8 ton ka vermicompost man la u snem na ka unit kaba la ai hapoh ka Organic Manure Scheme 2023-24. U die ïa ka ha ka dor Rs 30 shi kilo, bad u lah ban ïoh haduh Rs 54,000 ha ka shi snem.
Ka District Horticulture Office, Ampati, ka la pynshlur ïa ka rukom pyndonkam ïa ka sboh organic ban pynduna ïa ka jingshaniah ha ki tiar bad ki jingdonkam kiba wan na shabar. Ka jingmang pisa na bynta ki vermicomposting unit ka la ai naduh 2023-24 haduh 2025-26, ryngkat bad ka jinghikai ha ka rukom treikam bad ki jingpyni nuksa.
Na bynta uwei pat u nongrep, u Barnath D Sangma na Modhupara hapoh Rerapara C&RD Block, ka unit ka la ïarap ban pynhiar ïa ki jinglut. Hashuwa kane, u ju pynlut kumba Rs 10,000 man la u snem ban thied sboh eit masi na bynta ki jaka rep jhur jong u. Hadien ba u la ïoh jingïarap ha u 2024-25, mynta u pynmih kumba 2 ton ka vermicompost man la u snem na bynta ka jingpyndonkam jong u hi.
Ha Dathbanga, hapoh Zikzak C&RD Block, ka Trivina Ch Sangma ka pyndonkam kumba 2 metric ton ka vermicompost kaba ka pynmih man la u snem ha ka jaka sara syntiew jong ka. Kane ka la ïarap ban pynheh pynsan ïa ki jingthung bad pynkiew ïa ka iew jong ka..
Ha Dorambokgre, hapoh Rerapara C&RD Block, u Dilano Sangma u la pynkylla ïa ka unit jong u kaba 3m x 2m x 0.85m sha ka rukom treikam kaba ai jingïohnong ha baroh ar liang. Ka unit ka pynmih kumba 2 ton man la u snem, kaba u bynta ïa kawei na bynta ka rep jhur jong u bad ïa kaba sah u die ha ka dor kaba jan Rs 40 shi kilo.
Ki ophisar ki la ong ba ka vermicomposting, kaba pyndonkam ïa ki kynja wieh ban pynkylla ïa ki ñiut ki ñier kiba lah ban pyut sha ka sboh, ka la long kawei ka lad kaba rit hynrei kaba lah ban treikam bha ban pynkhlaiñ ïa ka jingïoh kamai jong ki nongrep bad ka rep ka riang kaba neh slem ha ka district.