Bthah u DC ka East Garo Hills ia ki skul bad college ban pynstet leh Adhaar ïa ki khynnah

Shillong, Nailur 24 : U Deputy Commissioner (DC) ka East Garo Hills, u RP Marak u la bthah ïa ki skul bad kolej ban pynsted ïa ka jingpynrung kyrteng Aadhaar khnang ba ki khynnah skul kin lah ban ïoh ïa ki skim kiba la mang da ka sorkar.
Ha ka jingialang ba kyrpang bad ki bor pynïaid skul bad college kaba long ha Williamnagar Circuit House ha ka Sngi Balang, hapoh ka Aadhaar Mission Mode Implementation Framework, u DC u la kyntu ïa ki skul bad college ban shim bynta da ka jingkitkhlieh ha kane ka jingpynrung kyrteng Aadhaar.
“Pynlong ïa ki Aadhaar Enrolment Camp ha ki jaka pule bad pynthikna ba ki khynnah skul kin pynrung kyrteng bad pynïasnoh ïa u Aadhaar jong ki, khnang ba kin ïoh ïa ki skim jong ka Sorkar bad kiwei ki jingmyntoi,” u la ong.
Ka Additional Deputy Commissioner ba dei peit ïa ka Aadhaar, ka DA Sangma, ka la ong ba ka district ka la poi sha 113% ka jingpynrung kyrteng Aadhaar baroh lang, hynrei dang don ki jingduna ha hapdeng ki khynnah pule.
Ka la pyntip ba 721 ngut ki khynnah pule ki dang hap ban pyndep ïa ka Mandatory Biometric Update (MBU), 3,200 ngut ki khlem pat ïoh ïa ki Aadhaar Card, katba 21,672 ngut ki dang donkam ban pynshisha haba ïadei bad u Aadhaar jong ki.
Ka la ong ruh ba ki Aadhaar Enrolment Camp na bynta ki khynnah pule ha ki skul jong ki hi ki la sdang naduh ka 01 tarik Nailur, kumta ka la kyrpad ïa ki jaka pule ban ïatreilang pura ban poi sha ka 100 persen ka jingpynrung Aadhaar.
Na ka liang u District Medical and Health Officer, u CEN Sangma, u la ai jingtip ruh ha ka jingïalang halor ki rukom ban ïoh ïa ki Certificate kha kiba donkam na bynta ka jingpynrung kyrteng Aadhaar jong ki khynnah pule.