SHILLONG, Nailur 24: Ka Nongthymmai SC ka la wanphai na ka namrem ban jop 4-1 pyrshah ïa ka Mawtawar SC hynne ka sngi Palei ha ka jingïakhun jong ka Group A ha ka lympung First Division Football league 2026 ba la pynïaid da ka Shillong Sports Association, ha SSA Stadium.
Ka jingjop ka la rah ïa ka Nongthymmai sha ka kyrdan ba ar ha ka Group hadien ar tylli ki jingïalehkai. Ka ïaryngkat mar 3 point bad ka Malki hynrei ka don ïa ka jingïapher kol kaba kham bun (+2 la 0).
Ha ka jingïalehkai, u Badonkupar u la long uba kongsan tam na ka bynta ka Nongthymmai, da kaba thep hat trick ha ka minit kaba 21, 28 bad 45. Katba kawei pat ka kol la thep da u Iaikyrmen (43’).
Ka Mawtawar ka la ïohlad ban pynphai kawei ha ka kylla miet lyngba u Ronaldo Rangslang (72’) hynrei kam shym la lah ban ai mynsiem ïa ka kynhun ba kan wanphai.
Hadien ka kylla ïakhun ba ar jong ka Group A, ka Nongkrem SC ka lamkhmat ha khlieh duh da 4 poiñ, bud sa ka Nongthymmai bad ka Malki kiba la kamai mar 3 poiñ ha ka kyrdan ba ar bad ba lai. Ka Laitkyrhong SC ha ka kyrdan ba saw da 2 poiñ, bad khatduh ka Mawtawar (1 poiñ).
Ka jingïakhun SSA 1st Division 2026 ha kane ka sngi Thohdieng (25.09.2026) kan long hapdeng ka Ryntih SC pyrshah ïa ka Mylliem Lum (Group B) ha ka por 12:15 baje mynsngi, ha SSA Ground.
