Halor ki 4 tylli ki mat ba sahteng jongka jylla ngi leit pynïasoh sha ka BJP : Lahkmen

Shillong, Nailur 23 : U Myntri Sorkar u Bah Lahkmen Rymbui ha ka sngi Balang ula ong ba ka rai jong ki phra ngut ki MLA ka United Democratic Party (UDP) ban ïasoh sha ka Bharatiya Janata Party (BJP) kam dei satia kaba jia syndet syndet hynrei kaba la urlong hadien ka jingïakren halor ki ishu ne ki mat bapher bapher kiba ktah ïa ka Jylla.
U Bah Lahkmen ula pynpaw ïa kane ha ka jingleit ïasoh sha ka BJP ha New Delhi hynne ka sngi Balang bad ong ba ki ishu kiba pynlong ïa ki MLA ban ïasoh BJP ki kynthup ïa ka jingpynrung ïa ka ktien Khasi bad Garo ha ka Khyrnit ba Phra ka Riti Synshar, ka amendment jong ka MRSSA, ban pynjynsur ïa ka kam tih dewiong bad pynkynriah ïa ka Them Metor na Them ïew Mawlong.
ïa kine ki 8 ngut ki MLA ka UDP la pdiang da ki nongïalam ba rangbah ka BJP kynthup u Myntri ka Sorkar Pdeng u Kiren Rijiju bad u nongaiktien ka BJP ba khmih ïa ka North East Sambit Patra bad kiwei kiwei.
Haba kren ha ka jingïalang pynïasoh, u Bah Lahkmen ula ai khublei ïa u Myntri Rangbah Duh u Narendra Modi bad ong ba ka ri ka la sakhi ïa ki jingkylla kiba khraw hapoh ka jingïalam jong u.
“Mynta ka dei ka sngi kaba kongsan ïa ngi baroh, khamtam na ka bynta ki 8 ngut ki MLA kiba ïasoh sha ka BJP. Nga da sngewnguh shikatdei eh ïa u Myntri Rangbah Duh ka ri. Hapoh ka jingïalam jong u, ngi la ïohi ïa ki jingkylla jong ka Ri” ong u Bah Lahkmen.
U ong ba kane ka sienjam ka dei kaba la don hapdeng ka jingïakren la katto katne por bad la pynïasnoh ïa ka bad ka jingangnud jong ki MLA bad ruh ki ishu kiba donkam ïa ka jingkyrshan na ka Sorkar Pdeng,
“Kane kam dei kaba shu jia syndet syndet. Ka jingïakren kala ïaid la katto katne por” ula ong haba bynrap ba katto katne ki MLA ba dang kham khynnah ki kwah ban noh synniang sha ka imlang sahlang bad leh eiei halor ki ishu kiba ktah ïa ka Jylla Meghalaya.
U Bah Lahkmen ula pyntip ïa 4 tylli ki ishu kiba kongsan ba la ïakren bad ki nongïalam ka BJP ha Delhi-ka jingpynrung ïa ka ktien Khasi bad Garo ha ka Khyrnit ba Phra ka Riti Synshar ka Ri, ka amendment jong ka Meghalaya Residents Safety and Security Act (MRSSA), pynsuk ïa ki lynti treikam ba ïadei bad ka kam tih dewiong ha Meghalaya bad ka jingpynkynriah ïa ka Them Metor na Them ïew Mawlong.
U pyntip ba ki nongïalam ka BJP kila ai ïa ka jubab kaba sngewtynnad halor kine ki jingsngewkhia ba pynsngew da ki MLA ka UDP.
“Baroh kine ki ishu, bad kiwei ki ishu ruh, ki nongïalam ka BJP ki la ai ïa ka jubab ba sngewtynnad, kaba kin sa leh noh ha kine ki khyndiat por ban wan. Na kata ka daw ngi la wan hangne ban ïasoh sha ka party” ong u Bah Lahkmen.