Ka jingpynïasoh BJP jong ki 8 ngut ki MLA UDP kam ktah ïa ka MDA lane ïa ka NPP : Conrad Sangma

Shillong, Nailur 23: U Myntri Rangbah ka Jylla, u Conrad K. Sangma, u la ong ba ka jingpynïasoh jong ki phra ngut ki MLA jong ka UDP sha ka BJP kan ym ktah ïa ka jingtreikam jong ka Sorkar MDA kaba ïalam da ka NPP.
Ha kajuh ka por u la ong ruh ba ka BJP kam shym la dawa ïa kano kano ka shuki Myntri shuh hadien ka jingkiew jong ka jingdon ki MLA jong ka seng ha Ïingdorbar Thawaiñ ka jylla.
Hadien ka jingpynïasoh jong ki phra ngut ki MLA UDP sha ka BJP ha New Delhi ha ka sngi Balang, ka jingdon ki MLA jong ka BJP ha Ïingdorbar kaba don 60 ngut ki dkhot ka la kiew sha 10 ngut. Da kane, ka BJP ka la long ka seng kaba ar ba don bun paid tam hapoh ka MDA, hadien ka NPP.
Haba kren bad ki lad pathai khubor, u Conrad Sangma u la ong ba ka rai jong ki MLA UDP ban pynïasoh sha ka BJP ka dei ka rai jong ki hi bad kam dei ka mat kaba ïadei bad ka NPP.
“Ka dei ka rai hapdeng ki ar tylli ki seng saiñpyrthei, bad ka dei ruh ka rai jong ki MLA na kitei ki party. Kam don jingïadei bad ka NPP. Kumta, ka dei ka mon bad ka rai jong ki MLA, bad ngam don eiei ban ong halor ka rai jong ki,” u la ong.
U Myntri Rangbah u la pynshai ba ka jingïatreilang hapoh ka MDA ka dang neh kumjuh bad ka jingpynïasoh jong ki MLA sha ka BJP kan ym ktah ïa ka jingtreikam jong ka Sorkar.
“Ka bor jong ka jingïatreilang ka dang neh kumjuh namar ka BJP ka don lang ha ka sorkar synrop. Kumta, kane kam ktah ïa ka rukom treikam jong ka Sorkar jong ngi. Bad kumba phi tip, ngi dang don ka jingbun paid ha Ïingdorbar, kumta ngi don ka jingshaniah ba ka jingtreikam jong ka Sorkar kan bteng kumba ju long,” u la ong.
Hynrei, u Conrad Sangma u la kubur ba ka lah ban don ka jingïapher jingmut hapdeng ki seng saiñpyrthei kiba don hapoh ka MDA namar ki MLA jong kawei ka seng ki la mih bad pynïasoh sha kawei pat ka seng.
U la ong ba ka dei ka bynta kaba ki seng kiba don bynta kin hap ban pynbeit hi para ma ki namar um kwah ban kren ei ei ne kynthoh halor ki daw bad ki jingthmu kiba ïadei bad ka jingpynïasoh jong kitei ki MLA.
Haba la kylli lada ka jingkylla ha ka jingïasam ïa ki shuki Myntri kan mih ne em, u Myntri Rangbah u la ong ba ka jingpynïasoh jong ki MLA kan ym ktah ïa ka Kynhun Myntri.
U Myntri Rangbah u la kyntait ruh ïa ka jingkylli kaba ïadei bad ka jingkiew jong ka BJP ha Meghalaya bad ka jingktah jong kane ïa ka NPP. U la ong ba ha ka saiñpyrthei, kawei pa kawei ka seng ka don ïa ka jingangnud ban nangkiew bad pynkhlaiñ ïa la ka jong ka nongrim.
“Ym don jingma haduh mynta. Kawei pa kawei ka seng saiñpyrthei ka kwah ban nangkiew.
Ha ka synshar paidbah bad ha ka saiñpyrthei, kawei pa kawei ka seng ka angnud ban nangkiew. Ngi ruh ngi kwah ban nangkiew ha ki jylla bapher bapher. Ngi la trei ha Manipur bad ha kiwei pat ki jylla. Kane ka dei ka rukom kaba ju jia ha ka saiñpyrthei,” u la ong.
U Sangma u la ong ruh ba ka NPP kan bteng ban trei ban pynkhlaiñ ïa ka nongrim jong ka bad ban pynbun ïa ka jingdon ki seat jong ka ha ki elekshon ban wan.
“Ngi hap ban pynthikna ba ha kane ka jinglong jingman baroh, ngin lah ban leh ïa ka bynta jong ngi ban pynbun ïa ka jingdon ki seat jong ngi. Ki elekshon kin dang wan bun. Nga la kren shai barabor ba ngi ju ïakhun da ki kyndon jong ngi hi, kum ka seng kaba don ïa ka jong ka jingithuh, bad kane kan bteng ruh ha ki snem ban wan,” u la bynrap.