Mission Education : Sha ka 457.41 klur tyngka ban pynbha ïa ki 2230 tylli ki skul ong u MR

Shillong, Nailur 23 : U Myntri Rangbah ka Jylla Conrad K Sangma ha ka sngi Balang ula ong ba ka Mission Education, kaba la pyllait ha u snem 2019, namar ka jingdonkam pisa la kheiñ ba kan kot sha ka 3000 klur tyngka ban pynbha lut ïa ki skul hapoh ka jylla., Ha kaba sdang la mang da tang 100 klur tyngka bad mynta la ïohi ïa ka jingdawa ban pynlut haduh 457.41 klur tyngka ban pynbha ïa ki 2,230 tylli ki skul ba don kylleng ka Jylla.
“Mareh 1000 kilometer lane kiew ïa u lum Everest- ka dei kaei kaei kaba ngi hap ban pynkhreh janai bha. Ngi sngewthuh ba ngi hap don ïa ka roadmap. Ngi donkam ïa ka policy. Ngi donkam ban tip hangno ngi don, shaei ba ngi kwah leit bad kumno ngin poi sha kata ka jaka” ong u Conrad.
U Conrad ula kren ïa kane haba buh ïa u mawnongrim ban tei ïa ka building ba thymmai jong ka MBoSE Regional Office, Shillong bad ka jingplie paidbah lyngba ka kor online ïa ki 81 tylli ki jingtei ki skul ba thymmai ba la pyntrei hapoh ka Mission Education Phase-II.
Ka MLA ka Dr M Ampareen Lyngdoh ha ryngkat ki heh Ophisar ka Tnad Pule Puthi bad ka MBoSE ki la ïa don lang ha kane ka jingïalang.
Haba ai jingkren, u Myntri Rangbah ula ong ba ka MBoSE Regional Office Shillong ka la treikam na ka building ba shipor la 45 snem. Naduh ba pynkha ïa ka ha u 1981 kum ka Shillong Cell ban shakri ïa ka thaiñ Khasi-Jaintia, ka Ophis ka la treikam napoh ka Ophis u Inspector of School, Mawkhar, ka Education Guest House ha Laitumkhrah (1995), ka MBoSE Guest House (1998) bad ka Taxation Building ha Lower Lachumiere naduh ka 22 tarik Nohprah 2005.
Ka Ophis ka khmih ïa baroh ki 7 tylli ki district ka ri-lum Khasi bad Jaintia, 1,329 tylli ki skul secondary, 397 tylli ki skul higher secondary, 97 tylli ki SSLC centre, 78 tylli ki HSSLC centre bad thung ïa palat 1,300 ki examiners man u snem.
Ha kane ka jingïalang, u Myntri Rangbah ula pyllait ruh ïa ka CM Impact Guide Book ba la pyndonkam da ka AI. Ula pyllait ruh ïa ki grant hapoh ka Samagra Shiksha Abhiyan : School Uniform Grant 2026-27 : 600 tyngka man ki khynnah pule na ka bynta ki 2,98,013 ki khynnah pule (1,47,419 ki shynrang bad 1,50,594 ki kynthei) kaba kot haduh 17.88 klur tyngka, ka ban phah beit beit lyngba ka DTB sha ki bank account ba la pynïasoh Aadhaar jong ki Kmie Kpa/ ki nongsumar, kynthup ki composite grant, textbook grant bad ka inclusive education grant.
Kine ki kynthup ïa ka hok leit pule na ka bynta ki Khynnah ba donkam kyrpang 57.62 lak tyngka na ka bynta ki 3,440 ngut ki nongïoh bynta, Escort Allowance (852), Transport Allowance (908), Stipend ïa ki Kynthei (924) bad ka pule puthi ha ïing na ka bynta ki 756 ngut ki khynnah ki bym lah ban leit skul. Ka composite grant baroh lang ka kot 49.8 klur tyngka.
Haba kren halor ki jingpynkylla ba la wanrah ha ka pule puthi, u Myntri Rangbah ula ong “Ka long kumba mareh 1000 kilometer lane kiew ïa u Lum Everest- Ngi sngewthuh ba ngi hap ban don ïa ka lynti ïaid (roadmap). Ngi donkam ïa ka policy. Ngi donkam ban tip hangno ngi don, shaei ngi kwah ban leit, bad kumno ngin poi sha ta”.
U ong ba ka synshar khadar kam dei eh halor ka jingheh ka sienjam marwei, hynrei halor ka sienjam kaba rit bad kaba treikam bha. Haba pynkynmaw ïa ka jingsdang jong ka Mission Education ha u 2019, haba ka jingdonkam pisa ka kot haduh 3000 klur tyngka, ula ong ba ka Sorkar kala sdang da ka song pisa ba 100 klur tyngka.
Ka Mission Education mynta kan pynlut 457.41 klur tyngka na ka bynta ki 2230 tylli ki skul –Phase-I (208 ki skul kan kot 109.33 klur tyngka ), Phse-2 (111 ki skul –97.38 klur tygka ), Phase-3 Engineering Cell (117 ki skul- 57.12 klur tyngka), Phase4 4 MIDFC (1608 ki skul –62.50 klur tyngka ) bad Phase-5 (186 ki skul-131.08 klur tyngka). Ryngkat kane, 182 tylli ki skul lah pynthymmai ïa ki da ki digital classroom, STEM labs bad ICT hapoh ka project SHCDM ba kyrshan ka ADB.
Haba pynpaw ba ki jingmih ki kham kongsan ban ïa ka jingpynlut, ula kdew ïa ka CM IMPACT, ka rynsan ai jinghikai ba la pndonkam da ka AI. Kane ka rynsan ka ai ïa ki jingthoh kat kum ki lynnong jong man ki sobjek, chatbot support, mock test bad ki jingbatai ïa ki jingkylli, ka ban sa pynïaid ruh da ka offline mode.
Ula ong ba ka prokram ba la pynleit jingmut lyngba ka CM IMPACT kala synniang sha ka 41.2 % ka jingkiew ha ka jing don ki khynnah pule kiba pass ïa ki eksam.
Haba ïasam jingtip ïa ka jingkiew ka Jylla, u Myntri Rangbah ula ong “Ka PGI 2.0 scrore : 448 (2024, Akanshi-3) sha ka 525.71 (2026, Akanshi-1)-kaba kiew haduh 77.71 point, mynta kaba ïaryngkat bad ki 15 tylli kiwei pat ki Jylla. Ka thong : Kan tam 580 point bad 700 point ban rung ha ka top 10 jong ki Jylla ha ki 2 snem ban wan.