SIR 2026 : 85.53 % ladep bishar bniah ïa ki kyrteng bad sah satang 999 tylli ki notice ban phah ïathuh u CEO

Shillong, Nailur 22 : 85.53 % ki kyrteng la dep ban bishar bniah ha ka Special Intensive Revision (SIR) 2026 bad kiba dang sah ne ki notice ban phah sha kiba hap ban bishar bniah ïa ki kyrteng ki long sa tang 999 tylli, ïathuh u Chief Electoral Officer (CEO) u Dr BDR Tiwari ha ka Sngi Ba Ar.
U Dr Tiwari u la shong bishar bniah ïa kane ka kam bad ki District Election Officer (DEO), ki ERO, AERO bad kiwei kiwei ki ophisar lyngba ka Onlice khnang ban tip katno la dep ban bishar bniah bad sa katno dang sah ban phah ïa ki notice sha kito kiba donkam ban bishar bniah ïa ki kyrteng jongki hadien ba la dep pynmih ïa ka Draft Electoral Roll.
Haba batai bniah halor kane, u CEO u la iathuh “ Na ki 21,69,243 ngut ki nongthep vote kiba la paw kyrteng ha ka Draft Electoral Roll, ki don haduh 6,51,735 tylli ki kyrteng kiba hap ban bishar bniah. Na kine 6,50,736 tylli la dep phah notice bad kiba dang sah ki long sa tang 999 tylli ki notice. Na kine 5,57,402 la dep ban bishar bniah kaba long kumba 85.53 %.
Kat haduh mynta la lap bna 659 ngut ki nongthep vote ki dei ki bym ïoh pynrung kyrteng ha ka Final Electoral Roll namar kim don ki kot ki sla kiba biang ban pynthikna ïa ka jinglong trai shnong jongki. Ki don pat haduh 17,97,168 ngut ki nongthep vote kiba la ïoh ban pynrung kyrteng biang ha ka Electoral Roll shwa ban shon bad pynmih khatduh ïa ka.
Na ka liang u Dr Tiwari u la kyntu ïa ki ophisar ba kin pynsted ka jingbishar ïïa ki kyrteng bad ban peit ruh ba kan ym don kano kano ka jingleh shilliang khmat bad baroh kiba dei hok ban ïoh rung kyrteng ki dei ban ïoh rung. Ki nongthep vote ki dei ruh ban kynmaw ba ka jingïoh pdiang ïa ki notice bad ka jingpan jingpynshai na ki kam mut ba ki la duh ïa ka hok ban ïoh thep vote.
Shwa ban pynmih ïa ka Draft Electoral Roll ka tnad election ka la ïoh pdiang haduh 20948 tylli ki application kiba kynthup 11,548 lyngba ka form -6, 1220 lyngba ka form -7 ban pyrshah ïa ka jingshah weng kyrteng bad 8,180 lyngba ka form =8 na ka bynta ban pynkynriah kyreng ne ban pynbeit ïa ki kyreng. U la ïathuh ruh ba la thung haduh 1,814 ki Booth Level Agent da ki Seng Saiñ Pyrthei bapher bapher naduh ki National haduh kiba don tang hapoh ka jylla. Ka tarik ba khatduh na ka bynta kine ki Claim and Objection ka la kut ha ka 18 tarik Nailur. Ka jingbuh por ban pyndep ïa ka jingbishar bniah ka long 17 tarik Risaw bad ka jingpynmih ïa ka Electoral Roll kan long ha ka 21 tarik Risaw.