Theh symbai dohkha ka ENBFA ha ka wah Aphah, Umkiang bad buh jingmana ban ïada ïa ka wah bad ki doh um
Khliehriat,Nailur 21: Ki nongkitkam bad ki dkhot jong ka Eastern Narpuh Border Fishing Association ( ENBFA ) ba la lam khmat da u President, u bah Fin Surong bad Secretary, u bah Nine Lyngdoh hynnin ka sngi saitjaiñ ki la theh haduh palat 1500 tylli ki symbai dohkha ha ka wah Apha kaba don ha shnong Umkiang, East Jaiñtia Hills District bad kane ka jingtheh symbai dohkha ka long halor ka jingthmu ba kito kiba ju sngewtynnad ban khwai dohkha kin ioh ban wan pynbyrngia ban khwa ha kane ka wah namar kane ka wah ka dei ka wah kaba paw bha ha ka thaiñ Narpuh ha kaba ki rawon ruh ki ju sngewtynnad ban leit khwai bad don ruh kiba ju leit sah miet ban khwai dohkha.
Ïa kane ka jingtheh symbai dohkha jong ka ENBFA la sakhi lang ruh da ki rangbah shnong ka thaiñ ba kynthup u Waheh Shnong Umkiang, u bah Lasting Pala, Waheh Shong Pyrtakuna, u bah Love-You Bareh, Waheh Shnong Kuliang, bah Min Lamare lem bad ki paidbah nongshong shnong jong ka thaiñ.
Kum ka jingpynbyrngia ïa ki paidbah, ka Eastern Narpuh Border Fishing Association ka la pynlong ruh da ka jingiakop khwai dohkha ha kane ka wah Apha bad ki nongshong kiba na Umkiang, Kuliang bad Pyrtakuna ki la ïa wan iashimbynta ha kane ka jingiakop khwai dohkha.
Ha kajuh ka por, u bah Fin Surong bad u bah Nine Lyngdoh kiba dei ki nongïalam jong ka Association ki la pynsngew ïa ki kyndon bad jingmana ban tehlakam ïa ki briew kiba thmu ban shim kabu ban pynsniew ïa ka wah bad pyniap dusmon ïa ki doh um, ki la pynbna ba ka Association ka khang pyrshah pyn ap jar lane ban buh jar, ban tong dohkha mynmiet, ban kawang bom ha ka wah, ban ber eit masi, ban wieh dawai ha ka wah, kine ki jing khang pyrshah bad jingmana ki long ban pynneh pynsah ïa ki doh um kiba don ha ka wah Apha, ka Association ka shah bad ka pdiang sngewbha tang ïa kito ki rawon kiba khwai da ki ryngwiang khwai, shuh shuh la khang ruh ban khwai ha ka sngi u Blei.
Ka Association ka byrngem ba lada lap ïano ïano kibapynkheiñ ïa kitei ki kyndon kan pynshitom da kaba tyngeh kaba katkum ki aiñ ba la buh.