NE Zone Inter-State Badminton C’ship 2026: Jam ki shipara ka kur Kharbuki sha ka QF; Rah ka Assam ïa ka nam Team Champion
Shillong, Nailur 17: U Raynell bad Gavin Kharbuki kiba dei artad ruh shipara ka kur Kharbuki ki la lah ba kin jam sha ka wat ïakhun Quarterfinal, katba ka kynhun ïalehkai ka Assam ki la sar lut baroh naka bynta ban ïoh ba kin rah ïa ka nam lahduh jong ki kynhun lane team champion ha ka sngi kaba ar jong ka lympung North East Zone Inter-State Badminton Championship 2026, ha JN Indoor Stadium, hynne ka sngi Palei.
Ha ka phainal jong ka team event, ki khynnah shynrang ka Assam ki la lah ba kin pynliem ïa ka Arunachal Pradesh bad ha ka kyrdan ïakhun jong ka Men’s team final pat, ka Assam ka la lah ba kan pynliem noh ïa ka Manipur, katba na ka liang ki khynnah kynthei bad women’s, ka Assam ka la lah ba kan pynliem ïa ka Mizoram.
Kumjuh ruh ha ka sngi kaba ar jong kane ka lympung, ka kynhun ïalehkai jong ka Meghalaya, ka la lah ban kheit ïa la ki soh ba thiang ka jong ki ha ki jingïakhun ba tang marwei, ha kaba ka Netania T Tariang ka la lah ba kan pynliem ïa ka Choying Tsepel Tamang ka Sikkim da 15-2, 15-3 ha ka kyrdan Girl’s U-19, katba ka Sneha Chetri ka la shah liem noh ha ka thei ïalehkai ka Mizoram ka Lalnunhluni da 15-12, 15-13.
Katba u Raynell u la lah ba un pynliem noh ïa u Porvash Prasad ka Sikkim da 15-4, 15-10, bad u Gavin pat u la lah ba un pynliem noh ïa u Lalpekhluzuala ka Mizoram da 15-6, 10-15, 15-7.
Haba phai sha ki jingïakhun final jong ka team event, ki khynnah ka Assam ha ba sdang jong ka sngi ki la lah ban pynliem da 2-0 ïa ka Arunachal Pradesh bad ki khynnah kynthei pat ki la lah ban pynliem ïa ka Mizoram da 2-1.
Nangta ka jingïakhun ha ka kyrdan jong ka Men’s bad Women’s team event, ki rang ïalehkai ka Assam ki la lah ban pynliem ïa ka Manipur da 3-1, bad na ka liang ki kynthei ki la jop da 3-0 ïa ka Mizoram, kaba ha kane ka kynti ïa ka jingjop ka Assam la lam khmat ïa ka da ka thei ïalehkai bna nam kane ka jylla ka Ashmita Chaliha, kaba la khur ïa ka takma ksiar ha ka 2024 Asia Team Championship.