Jowai, Nailur 17: Ka Diengchynrum SC bad ka Lumshnong YWSC ki la jop ïa la ki jong ki jingïalehkai ha ka lympung phutbol “Super Division” bad ka First Division League 2026 bala pynïaid daka East Jaiñtia Hills District Football Association (EJHDFA), ba la long hynne ka sngi Palei (17 tarik Nailur) ha madan Artificial Diengshynrum, Khliehriat.
Haba phai sha ka jingïakhun jong ka 6th Kyrmen Shylla Contribution Trophy League Stage 2026 ha ka kyrdan “Super Division”, ka Diengchynrum SC kala jop suk da 5-1 pyrshah ïaka Thangskai Tiger SC.
Ka Diengchynrum SC ka la pynkhihjar lyngba u T. Aktar Hussain (1 & 90+5’) ar kol bad ka hat trick na u Shaining Marbaniang (17, 46, & 51’). Katba ka shikol jong ka Thangskai Tiger la thep Lekiru Dkhar (61’).
Nangta ka jingïakhun jong ka Thomas Nongtdu Memorial Trophy ha ka kyrdan First Division League 2026, ka Lumshnong YWSC kala jop suk da 6-0 pyrshah ïa ka Dhana CSC. U Robert Khongjoh (69, 72 & 83’) u la thep hat trick, katba u Damehun Syih (32’), u Niponghi Sumer (45’), bad u Ridao Rupai (87’) ki la noh synñiang mar kawei ka kol.
