Hato ha u snem 2028, napdeng jong ki mano kiba nud ban ïakhun na ka ticket BJP

Shillong, Nailur 16: Hapdeng ka kynrum kynram ka sain pyrthei hapoh ka jylla Meghalaya halor ka jingthmu pynïasoh ki 8 ngut ki MLA ka United Democratic Party (UDP) sha ka Bharatiya Janata Party (BJP) mano napdeng kine ki phra ngut kiba nud ban ïakhun na ka ticket BJP ha u 2028.
Katkum ka tyllong khubor ba ïajan bha bad ka BJP, la ïathuh ba ka BJP kan ym ioh jingmyntoi eiei ruh na ka jingwan pyniasoh jong ki 8 ngut ki MLA namar ba ka National People Party (NPP) kaba lam khmat ïa ka sorkar MDA ka don ka jingbun paid ki MLA haduh 33 ngut.
“Ka jingmyntoi ïa ka BJP ka shu long tang ba kan kot ïa u number sha ki khat number ne double digit hynrei lait na kane ym don jingmyntoi eiei ruh em” ong ka tyllong khubor.
Shuh shuh ka tyllong khubor ka ïathuh ba napdeng kine ki 8 ngut ki MLA ka UDP ki ban pynïasoh bad ka BJP katno ngut na ki kiban treh ban ïakhun ïa ka election ha u snem 2028 na ka ticket jong ka BJP.
Haba ai nuksa ka tyllong khubor kala buh jingkylli ba hato u MLA ka Sohiong u Bah Synshar Kupar Roy Lyngdoh Thabah u nud ban ïakhun ïa ka election 2028 na ka ticket BJP bad kumjuh ruh ïa u MLA ka Ranikor u Bah Pius Marwein, u MLA ka Mawphlang u Bah Mathew Beyond Kurbah bad ruh ïa u MLA ka Shella u Bah Balajied Synrem kumjuh ruh u MLA ka Nongpoh u Bah Mayralborn Syiem.
Ha kaba ïadei bad u MLA ka Mawsynram u Bah Oland Sing Suin ka tyllong khubor kala ong, to kan don hi ka jingïakhun da kaba shu peit ïa ka vote katkum ka election MLA ba lah dep jong u snem 2023 katkum ka jingioh vote u Bah HM Shangpliang.
Shuh shuh la ong ba wat u Bah Lahkmen Rymbui ruh un ym nud ban ïakhun na ka BJP namar kumba iohi mynta u kyrtong ka NPP ruh u trei kam bha shaid shaid bad tang u Bah Kyrmen Shylla uba lah ban ïakhun na ka ticket BJP.