Ym lah pdiang u bah Metbah ba thmu leit pynïasoh ki 8 ngut ki MLA ka UDP sha ka BJP

Shillong, Nailur 16 : Wat la ki don napdeng ki 8 ngut ki MLA ka UDP kiba la kren shai sha ki paidbah ba ki don ka jingthmu ban pynïasoh noh shen sha ka BJP hynrei u President ka UDP u bah Metbah Lyngdoh u la kyntait ban pdiang ïa kane da kaba ong ba kane kam long kaba shisha bad ka dei kaba la shu mutdur suda.
“ Ki jingmutdur barobor ki dei tang ki jingmutdur namar ha nga hi ka shim ïa ka da kumne ba kam dei kaba shisha hynrei kaba bakla”. ong u bah Metbah ha ki lad pathai khubor haba kylli halor ka jingthmu phet seng ki 8 ngut ki MLA.
U la pdiang ba ïa kane ka kam la ïakren hapoh ka party.Ki jingmutdur ki la saphriang bha ha kine ki taiew bad kum ka party ngi la ïakynduh bad ïa kren sani halor kane khamtam bad kito kiba paw kyrteng ban leit pynasoh sha kiwei ki party.
U la ong ba ka party ka dang pyrshang ban wad jingshai ïa kine ki jingartatien bad lehse ki don ki jingbym ïasngewthuh jingmut hapdeng ki para MLA bad ka shem ba kam don kano kano ka jingbym ïahun.
“ Ma nga lem bad ki para nongïalam ha ka party ngi dang bud dien ïa kane ka kam ban lait na kino kino ki jingartatien ne kino kino ki jingbym ïasngewthuh jingmut hapoh ka party. Hynrei haduh mynta ngim pat lap ba kan don ka jingbymïasngewhun na baroh ki MLA. Kaei kaba ki kren bad pynpaw lada ka dei para marwei ne ha ki jingïalang kaba ngi la ïadon na ka por sha ka por. Nga la ïoh sngew na uwei ne arngut ki MLA kiba la kren shai ba kim don ei ei pyrshah ïa ka party ne pyrshah ïa ka kam nongïalam hapoh ka party” ong u bah Metbah.
Haba la kylli katno ngut ki MLA kiba dang ïadon bad u u la ong ba baroh ki 12 ngut ki dang ïalong kawei.
“ Nga shim ba baroh ki 12 ngut ngi dang ïalong kawei. Ka jingkylli ba ki don bad nga ne em kam mih satia namar ngi don hapoh ka juh ka shatri, hapoh kawei ka tnum bad hapoh kawei ka party. Ngi la ïa ïaid ryngkat lang lynter kine ki snem kum kawei ka party khlem da don kita ki jingkheiñ katno ngut ki MLA kiba don bad nga lane kiba pyrshah ïa nga. Kaba bha tam ka long pyrshang ban kylli na kiwei ki MLA la ki don bad nga lane bad no “ ong biang u bah Metbah.
Halor ka jingtrei shitom jongu kumno ban khanglad ïa kitei ki 8 ngut ban ym leit pynïasoh sha ka BJP, u bah Metbah ula ïathuh ba ka party ka dang ïakren bad ki. “ Na ka liang ka party ngi dang pyrshang ban pan jingshai ïoh ka don kano re kano ka jingsngew artatien ne jingbym hun hynrei ngim shem satia ba kan don kano kano ruh. Haba la kylli hato ki thmu ban leit pynïasoh sha kiwei ki party, na ka liang jong ki ruh kim kren shai la kin leit pynïasoh mynta ne lashai. La shu ïohi na ka por sha ka por ba ki shu ap sa tang ïa ka por te to ngin ïa ap namar katba kim pat shim rai tangba na ka liang jong ngi ngi la pyrshang ban ïakren ban ïasyllok bad ki na ka por sha ka por”: