Haduh 138 tylli ki bhah MBBS u 2026-27 hapoh ka Central Pool bad kiwei ki bha SMC, ïathuh ka sorkar

Shillong, Nailur 16: Ka tnad ka koit ka khiah jong ka sorkar Meghalaya ka la phah da ka jingpynbna ba dei shaphang ka Combined Counselling Standard Operating Procedure (SOP) na ka bynta ka jingthep klas ïa ki MBBS jong u snem 2026-27, kaba lah ban kot haduh 138 tylli ki MBBS seat ba hap hapoh ka Central Pool bad kiwei kiwei ki bhah kiba shah ïa ka jylla Meghalaya bad ka State Quota of Shillong Medical College (SMC).
Katba ka Combined SOP ka don ar bynta. Kaba bynta ba nyngkong ka don 96 tylli ki MBBS seat na ka bynta ka Meghalaya hapoh ka Central Pool bad kiwei ki quota, hynrei ka bynta ba ar ka don haduh 42 tylli ki State Quota seat ha Shillong Medical College.
Ïa ka rukom pyntreikam ka jingai jingmut, yn sa pynïaid da ka Meghalaya State Counselling Authority for Medical Education (MSCAMA). Katba ïa kawei pat ka bynta jong ka jinghikai ban pyni, ka jingai jinghikai ai jingmut na ka bynta kine ki ar tylli ki thup kan bud ïa ka rukom treikam kaba ïadei bad kaba ryngkat por kaba shongnia halor kawei ka thup kyrteng kiba ïoh khur marks bha kaba la pynkhreh na ka All India Rank jong ka NEET-UG 2026.
Ïa ki 96 tylli ki seat kiba hap hapoh ka bynta ba nyngkong, ka kynthup ïa ki 53 tylli ki Central Pool seat, 14 tylli ki seat ha NEIGRIHMS, 16 tylli ki seat ha RIMS Imphal, 10 tylli ki seat ha Government Medical Colleges jong ka Assam bad lai tylli ki seat ha ka jylla Tripura.
Kane ka pyni ba ka jingsam ïa ki seat lane jaka shong ka long 39 tylli ki jaka ïa ki Khasi bad Jaiñtia, 39 tylli ïa Garo, 14 tylli ki jaka ba khlem da pynkyrpang bad saw tylli ki jaka ïa ki Scheduled Caste (ST) bad ki Other Scheduled Tribes (OST), kaba shong halor ki kyndon ba bit ba biang.
Na ka bynta ka Shillong Medical College, ka National Medical Commission (NMC) ka la buh haduh 50 tylli ki MBBS seat na ka bynta 2026-27, ha kaba na ki phra, yn shah ban shong thoh eksamin tang kiba hap hapoh ka All-India Quota bad 42 hapoh ka State Quota. Ïa ki State Quota seat, yn sa sam katkum ka Meghalaya State Reservation Policy, kaba don haduh 40 persen ki Khasi bad Jaiñtia, 40 persen ki Garo, 15 persen ki Unreserved bad 5 persen SC/OST.
Ïa ka rukom pynrung kyrteng, yn pynwan katkum ka jingleh bha ha ka eksam NEET-UG 2026 bad ka aiñ pynbeit kyrpang jong ka sorkar jylla. Ki nongïaleh eksamin ki dei ban pyndep ïa ki kyndon pule, ka jaka shongneh, ka jaitbynriew bad kiwei ki kyndon ba dei hok. Ki dei ban pass ïa ka Class XII lane ka eksamin kaba katjuh bad ka Physics, Chemistry, Biology/Biotechnology bad English bad ki dei ban dap 17 snem ka rta ha shwa lane ha ka 31 tarik Nohprah 2026.
Ki nongïakhun eksamin kin hap ban registar da ka online kumba ka pyntip da ka MSCAMA bad hap pynshisha ïalade ba ki dei kiba la pyndep ïa ka eksamin jong ka NEET, ka kyrteng, thup syrnod, Permanent Residential Certificate (PRC), kyrdan pule bad kiwei kiwei ki kot ki sla jong ki jingpule ba tam kiba la pyndep.
Katba ïa ki kot ki sla ba dei hok, yn pynshisha ha ka por ba leit ha ka jaka thoh eksamin. Ki kyrtong kiba dawa bhah hapoh ka quota jong ka Meghalaya ki dei ban pyndep ïa ki kyndon kiba ïadei bad ka jingshisha long-trai shnong bad ki kot ki sla kumba la bthah.
Ka SOP ka dang shah haduh saw tylli ki kylla jong ka jinghikai ban ai jingmut, kynthup ïa ka Stray Vacancy Round, katkum ka jingbthah ki kyndon pynïaid ka jinghikai ai jingmut. Ki seat na ka bynta jong ki nongïakhun eksamin, kin donkam ban phah ïa ki kaiphod jong ki bad pyndep ïa ka jingthep kyrteng jong ki kaba biang. Ka SOP ka ai ruh ïa ki kyndon kiba ïadei bad ka jingaiti noh ïa ki shuki, ki jaka shong ba dang lait, ki eksam bad ki kyndon ban pynkut ïa ka jingïakhaid.
Ki nongïakhun eksamin kiba la ïoh jingkyrshan na ka sorkar ban ïaleh ïa ka eksamin MBBS ki dei ban soi ïa ka shithi sngewthuh jingmut bad ka tnad ka koit ka khiah ban shakri ha ka sorkar hadien ba kila dep pule. Katba ki khynnah pule MBBS kiba ïoh rung pule lyngba ka State Quota, kin hap ruh ban treikam shakri paidbah hapoh ki hospital sorkar ne ki hospital Mission kiba ym duna ïa ka san snem. Kane ka long thik katkum ki kyndon bad ki hukum ba la bthah hapoh ka Mandatory Medical Public Service Policy.
Ka MSCAMA kan treikam ïa ka State Counselling Control Room, miej ïa jingïarap bad kiwei kiwei ki jingpyntreikam lyngba ka por ba ai jinghikai ai jingmut. Kan sa pynmih ruh ïa ki jingpynbna, ki jingkylli bad kiwei kiwei ki jinghikai lyngba ki dur khih ba batai thik pa thik ha ki channel jong ki bad kin peit bniah ha ka rynsan social media ïa ki jingbakla ai jingtip ki jingpynbna ba lamler, ki website ba thok, kam leh thok bad kiwei kiwei channel ba pynmih ïa ki khubor thok.
Ki nongïakhun eksamin kiba donkam ban pynshai kin sngewbha ban leit sha ka Director of Health Services (Medical Education & Research) ha dmeshillong@gmail.com lane phone ha kine ki nombar 0364-2591510 / 94851 06663.
Ka tnad ka bthah ïa baroh ki nongïakhun eksamin ba kin shaniah tang ba ki website ba shisha na ka bynta ki jingpynbna bad jingïakren kiba la pynmih da ka MSCAMA bad ka tnad ka koit ka khiah bad ka bha ka miat ki paidbah ha ka por ba don jingai jinghikai ai jingmut bad ka rukom thep kyrteng ïalade.