Ki jingklumar ki mih namar ka Assam kam kheiñsnep ïa ka Meghalaya: MDC Rambrai

Nongstoiñ, Nailur 07: Hadien ka 5 tarik Nailar 2026, ka sngi ka jingwan thoh Khanasamari jubor ka Assam ha ka shnong Noapara kaba dei kawei na ki shnong ha ka thaiñ Langpih, ha kaba ka la mih ruh ka jingïapyrshah kaba jur da ki briew na Meghalaya, mynta ka sngi na ka liang u bah Lurshai Kharbani MDC ka Rambrai Jyrngam ryngkat u R.G.Momin MLA ka Rambrai Jyrngam ki la leit sha Nongstoiñ ban ïakynduh ïa ki bor pynïaid District ryngkat ki jingujor halor katei ka jingjia.
Haba ïakren bad ki lad pathai khubor hadien ba ki la mih na kamra treikam jong u Additional Superintendent of Police West Khasi Hills ha ka sngi nyngkong, u Bah Kharbani u la ong, “Na ka liang jong ka sorkar Jylla bad wat ka tnad pulit ruh kim tip satia ïa kata ka jingwan kyndit kynsan jong ki briew ka Assam ban leh ïa ka census. Na kaei ka daw ba ki wan ruh kim shym la ïathuh satia, hynrei dei tad ki nongïalam shnong kiba la ïathuh ba ki wan ha ryngkat ka jingpynbor ban leh ïa kata ka census hapoh ka Jylla Assam”.
“Hynrei, na ka liang ka Jylla Meghalaya hadien ka jingbthah da u Deputy Commissioner ba ka shnong Noapara la ïoh ban leh Census ha ka Jylla Meghalaya. Hynrei ka Assam mynta ka wan pynwit biang bad ïa ka census ym dei ban shu pynbor da mano re mano hynrei ka dei beit ka mon laitluid jong ki paidbah. Haba ki paidbah jong ka shnong Noapra, Langpih, Kamphaduli bad kiwei kiwei ki la dep leh ïa ka census hapoh ka Jylla, ka Assam kam don hok shuh ban pynwit”.
“Ka long kaei kaei kaba sngewsih ba ha kato ka sngi ba ki wan ban leh jubor ïa ka census, ki khlem pyntip ei ei sha ki bor pynïaid District jong ka West Khasi Hills, dei na kata ka daw ka sa mih ka jingklumar. Kumba ka paw shai hi ka Assam kam kheiñ snep ïa ki rai ba la dep ban ïa teh soskular bad ka Meghalaya”.
“Na ka liang jong nga kum u nongmihkhmat nga phah ïa u kyrwoh sha ki briew jong ka Assam, ba ym bit ban wan pynwit ïa ki briew jong ngi nangne shakhmat. Ai lad ba ki briew jong ngi kin shong suk bad haba ki la dep ïa a census ha Meghalaya, balei ban pynbor namar ka sorkar ruh ka la dep kren shai kdar ba ka shong ha ka mon ki paidbah”.
“Nga pynrem jur ruh ïa u Arjun Chetri uwei na ki nongïalam jong ka Rabha Hasong Autonomous Council, u ba kynthoh ba ki Khasi bad Garo jong ngi ki ju sngewtynnad bha ban leit buhai shnong ha Assam. Hynrei nga buh ka jingkylli mynno ngi leit buhai shnong, namar ka Noapara ka hap hapoh u pud u sam jong ka Meghalaya. Utei u briew u ong ruh ba ka Kampholduli kam dei kata ka jaka ïakajia pud hynrei dei beit jong ka Assam”.
“Kum u nongmihkhmat ba la jied da ki paidbah um dei ban kren klumar khlem da ïoh ïa ki jingtip kiba bniah. Lada u ïai kren kumne na ka liang jong ngi ruh ngim banse ban shim da kawei pat ka sienjam”.
“Halor ka jingpyntieng ïa ki briew jong ngi da kaba kynnoh ba dei u rangbah shnong ka Noapara u ba thang ïa ka kali u pulit na Assam dang shen, ka dei kaei kaei kaba ngim lah satia ban pdiang. Na ka liang jong nga, nga la dep ban bthah ïa u sordar ka Noapara ba dei ban ujor da ka defamation case namar kane ka jingkynnoh klumar kaba khlem jingpynshisha. Namar ka jingthang kali kam don jingïadei ei ei bad ka jingwan jong kita ki briew na Assam ban wan leh census”.
“Na ka liang jong nga, nga kyntu ruh ïa ki shnong ki jong ngi ba ngi dei ban ïa tylli ban ïaleh pyrshah ïa kine ki jaid briew kiba wan pynwit ïa ngi. Nga kyntu ruh ïa ki bor ka sorkar Assam ba kim dei ban leh klumar nangne shakhmat. Lada kwah ban ïakynduh bad ki briew jong ka Meghalaya, dei ban ai shwa ka jingthoh sha u Deputy Commissioner jong ka West Khasi Hills”.
“Nga kyntu ruh ïa ki pulit ka Jylla ba ki dei ban long kiba la khreh lypa ha kano kano ka por lada wan kino kino ki jingjia ba kin shimkhia ban ai jingïada ïa ki briew jong ngi. Nga la bthah ïa u Additional Superintendent of Police ban long ba la pynkhreh nangne shakhmat”.
“Ngi la rai ruh ban buh ïa ka ktem pulit ba shi por ha Noapara, khnang ban pynneh ïa ka jingsuk hapoh ka dong ka thaiñ jong ngi. Ïa kane ngin sa leh ha ryngkat bad u MLA ban thoh bad ïakynduh markhmat ruh bad u Home Minister ha ka 9 tarik”.