Ha tduh jong ka Liengsuiñ Air India Express la pyninam ïa ka jaiñ tynrai ki Khasi ka Khneng

Shillong, Sept 7: Ka rukom suh shrong ïa ki jaiñ tynrai kaba la tip kum ka Khneng, kaba la leh naduh ki 200 snem mynshwa ha ka shnong Mustoh, East Khasi Hills, kala ïoh jaka ban pyni nam ha ka bynta ka tduh jong ka liengsuiñ Air India Express kum shi bynta jong ka #TalesOfIndia initiative.
Ka Air India Express, ha ka rynsan social media, ka la pynpaw ba ka Khneng ka dei ka jingthaiñ tynrai ki jaidbynriew Khasi jong ka Meghalaya, ha kaba ka rukom suh bad ka jingoh shrong ka pyninam ïa ka kolshor ba riewspah kaba naduh hyndai hynthai jong ka thaiñ.
ïa ka Khneng la pynwandur ha kata ka rukom suh ha ki bynta jong u pud jong ka jaiñ da kaba suh da ka kti ïa u ksai ryndia. Ka kyntien Khneng ka mut “border” ne khappud ha Khasi bad kdew ïa ka rukom buh ïa ka rukom suh ha ki jaiñ, kynthup ïa ka jaiñpien.
Kane ka rukom pynwandur kadei kaba la pawnam ha ka rukom oh shrong kyrpang ban pynitynnad, kynthup ïa ka jingbuh ïa ki mawkordor bad kiwei kiwei ryngkat bad ki ‘Motif’ kiba la pynshlur lyngba ki jingthung bad ki jingim ki bapher bapher.
Ka Khneng ka dei ka rukom suh jain kaba kyrpang da ki nongthaiñ bad ki nongsuh jaiñ tynrai bad kam dei satia tang ka jingpynwandur ha ka jaiñ hynrei kila khein thik pa thik ïa ki ksai ban btin lynti ïa ka jingsuh, kaba ailad ïa ki ban thaw ïa ka rukom suh bad ka jingpynwandur ryntih ïa ki shrong.
Kumba ju leh tynrai hi, ha kane ka rukom suh la pyndonkam da u ksai wul uba ïong ne da u ksai kynphad uba rben pyrshah ïa u ksai ryndia ïa kaba la tip ruh kum ka jaiñ ryndia.
Ka Mustoh kadei kaba don ïa ka jingïadei bha bad ka Khneng mynta da ki pateng la pateng. Kane ka rukom suh kala mad pat ïa ki jingtynjuh na ka jingduna jong ki nongsuh, kaba la pynlong ïa ki ban shim ïa ki lad ban ïaleh ban pynneh pynsah bad ban kyntiew ïa kane ka rukom suh tynrai kaba long kaba kongsan bha.
Ka jingpynrung ïa ka ha ka Air India Express’ Tales of India Series, kala pyninam ïa ka jingsuh tynrai ka Meghalaya, ryngkat bad ka jingpynwandur kyrpang jong ki Khasi, mynta haba leit ba wan da ka liengsuiñ na kawei ka jaka sha kawei pat.
“Ha ka bynta kaba sha tduh jong ka liengsuiñ, kane ka pyni ïa ka jingthaiñ kaba long shi bynta jongka #TalesOfIndia, kaba rah ïa ka bynta kaba im jong ka riti dustur kaba dang im jong ka Meghalaya sha ka lynti ïaid kaba thymmai, la pynpaw ka kad liengsuiñ.
Kane ka sienjam kala pyni ruh ïa ki rukom thaiñ tynrai na kiwei ruh ki bynta jong ka ri India, da kaba pyndonkam ïa ki ban pyninam ïa ka kolshor ba riewspah bad kaba naduh hyndai hynthai.
ïa ka Mustoh bad ïa ka jaidbynriew Khasi, ka Khneng ha ka liengsuiñ jongka Air India Express ka long kum ka rynsan ha ka ri ban pyninam ïa kane ka rukom suh tynrai ïa kaba la leh ha East Khasi Hills mynta lah palat ïa ka 200 snem.