Hadien ba ka jingaipor ba 3 sngi ka KSU ban pyntreikam ïa ki jingkular ba ka dawa kan kut noh

Shillong, Nailur 07: Ka sorkar jylla ka khot ïakren biang ïa ka Khasi Students’ Union (KSU) ban ïakren biang halor ki mar jingdawa jong ka ha ka sngi baar ha ka por 4:30 baje janmiet ha Secretariat Conference Hall, ha ka ban pyniaid da u Chief Secretary ka jylla u Dr Shakil P. Ahammed.
Kane ka jingkhot ïa kren ka la long hadien ba u Myntri Rangbah ka jylla u Conrad K. Sangma u la khot ka jingïalang jong u bad ka KSU ha ka 26 tarik u Nailur hadien ba mih ki jingïakhih kiba la neh katto katne sngi kaba kynthup da ka jingsdang ka jingïakhih da kaba pynlong ïa ka jingïaid rally ki thuk thuk ha ka 19 tarik u Nailur kaba la lam sha ka jingjia umsnam bad ka jingshah kem ki laingut ki nongïalam ba hakhmat jong ka KSU.
Ki san tylli ki jingdawa jong ka KSU ki long ka jingshim kam pyrshah ïa ki heh ophisar ha ka jingbishar paidbah ne ka public hearing kaba la long ha ka 31 tarik u Naitung ban buh ïa ka Shree Cement project ha East Jaiñtia Hills, nangta ka jingpyntreikam pura ïa ka Meghalaya Residents Safety and Security Act, ka jingpyntreikam ïa ki khyrdop talasi ne ki facilitation centre ha ki entry points ne ki jaka rung jaka mih, ka jingpyntreikam ïa ka Migrant Workmen Act ba la pynkylla, bad ka jingpynbha thymmai ïa ka kam thungkam thungjam ha NEIGRIHMS.
Hadien kitei ki jingïakren u Myntri Rangbah u la pynbna ba ka jingïakren ka la long kaba tei bad ong ba ka sorkar ka mynjur ïa ki katto katne ki sienjam.
Halor ka kam jong ka Shree Cement, u Sangma u la pynbna ba baroh ki kam hapoh ka project site jong ka Shree Cement yn pynsangeh shuh tat haduh ban da dep ka fact-finding committee ba laitluid, ba la khlieh da u heh ophsar ba la rangbah u bym don jingïadei bad ki bor pynïaid district, un bishar ïa baroh ki jingsngewkhia halor ka public hearing, ki jingktah ïa ka sawdong sawkun bad ka jingïashim bynta jong ki riew shemphang.
Halor ka MRSSA, ka sorkar ka la ong ba kan pynsted ïa ka jingshim kyrteng ïa ki briew kiba wan na kiwei ki jylla bad ka jingbun ïa ki kor technology halor ki application kiba long da ka centralised database.
Halor ki nongbylla kiba wan nabar ne kiba poiwir, ki heh ophisar ki pyntip ba ki kyndon hapoh ka Act ba la pynkylla la dep ban pynshai bad yn pyntyllun ïa ki kam hadien ba ki ophsar ki la ïoh ki jingpynshai ba biang.
Ka sorkar bad ka KSU ki la mynjur ban pynlong ka jingleit jurip lang hapoh Umling Facilitation Centre da ka jingbuh thong ban pyntreikam noh ha shwa ka Christmas.
Hadien ka jingïalang na ka liang ka KSU ka la rai ban pynsangeh noh shwa shipor ïa ki jingïakhih, hynrei ka la kren da kaba shai ba ka rai ka long halor ba ka sorkar kadei ban pynurlong ïa ki jingkular jong ka.
Lyngba kine ki jingdawa kiba bun kiba la sdang naduh ka jingïalang kaba la long ha ka 26 tarik u Nailar bad ba ki jingdawa ki dang sah, mynta ka sorkar ka la khot biang ïa ka KSU ha ka jingïalang buddien ban khlieh bad pynïaid da u Chief Secretary, ban bishar ïa ki jingïaid ki kam bad ban syllok ïa ki lynti ban ïaid shakhmat.