Na ka jingïania, da u sdie pom ka kurim da u sdie na khlieh ïa la u kurim katba dang peit TV

Nongpoh, Nailur 07: Ha kawei ka jingjia kaba sngewtriem bad pynpar ñiangkhriat ïa kiba bun, ka jingïañia hapdeng ki ar ngut shi kurim haka shnong 9 mer Baridua, kala poi pynban sha ka jingïaumsnam hadien ba ka kurim kala pom syndon da u sdie ïala u kurim katba u dang peit TV.
Katkum ka jingtip ba la ïoh lum, la ong ba katei ka jingjia kala jia haka miet sngi u Blei haka por kumba 9 baje eiei ha kaba kala mih ka jingïañia kaba jur hapdeng kitei ki shi jur haduh ba u kurim ba la tip kyrteng kum Sikander Lyngdoh, u la shah pom da u sdie ha bynta ka khlieh hala ka jong ka kurim kaba la tip kyrteng kum ka Poonam Bosper haduh ba u la mynsaw jur bad khlem tip briew shuh, bad la pynkit noh ïa u sha jaka sumar sha Health City Hospital.
Hadien ba ioh jingtip ïa kane ka jingjia u Rangbah Shnong u la pyntip noh mar-mar sha ki pulit ka Khanapara, kiba la poi sha katei ka jaka ban pynlong ïa ka jingtohkit bad ki pulit ki la lap ïa u Sikander uba la thiah lyngktar ha madan hapoh ka ïing sah, ryngkat ka snam ba la tuid ha madan namar ka jingmynsaw kaba jur.
Hadien ka jingjia, ka kurim jong u ka Poonam ka la phet krad noh na katei ka jaka bad dei mynta ka sngi ki paidbah ki la ioh ban kem ïaka bad rah sha iing dorbar ban bishar shnong, bad naka liang ka shnong kala aiti noh sha ki pulit ban leh ïa kaba donkam katkum ki kyndon aiñ.
Naka liang u Bah Ioanis Narleng Rangbah Shnong u la pynrem jur ïa kane ka jingjia ba katei ka longkmie ka thmu ban shim syndon ïaka jingim jong u lok bad kum ka shnong ka kyrpad ïaki bor jong ka aiñ ban pynshitom da kaba tyngeh pyrshah ïa katei ka briew namar katne snem ym pat ju don ka jingjia haduh ban da pynpar ñiangkhriat ïa kiba bun ba lang bad kaba la pynkyndit lut ïaki paidbah nongshong shnong katei ka thaiñ.
Naka liang ki pulit ki dang pynlong ka jingtohkit halor katei ka jingjia ban lap ïaka daw tynrai.