ïakynduh ka MSOA bad ki jaka pule ba pawkhmat jong ka Tura ban pynkhlaiñ ïa ka kam ïalehkai ha skul

Tura, Nailur 01: Ka Meghalaya State Olympic Association (MSOA), ha ka 30 Nailar 2026, ka la pynlong ïa ka jingïalang bad ki jaka pule ba pawkhmat jong ka Sorkar bad ki jaka pule shimet jong ka Tura la pynlong ha Tura Circuit House ban ïatai kumno ban pynkhlaiñ ïa ka kam ïalehkai hapoh skul.
ïa kane ka jingïalang la pynïaid da u bah John F. Kharshiing, Working President ka MSOA, ha ka jingïadon lang u Deputy Commissioner, West Garo Hills District, ryngkat u Assistant Director, Department of Sports and Youth Affairs (DSYA), bad u District Sports Officer, West Garo Hills District.
Na ka liang u Working President, ka MSOA, u la kyntu ïa ki skul ba kin ïatreilang kham jan ha kaba kyntiew ïa ka kam ïalehkai da kaba thaw bad pynrung kyrteng ïa ki klob ne ki synjuk kiba ïadei bad ki jingïalehkai Olympic.
U la ban jur ba ha ka jaka ba ki skul kin pynlong shimet ïa ki lympung jong ki ba man la u snem (annual sports), ka rukom ïalehkai kaba kham ïadei kan thaw ïa ki lad ki lynti kiba kham heh na ka bynta ki khynnah skul ban ïashim bynta lyngba ki inter-school.
U la pynpaw ruh ïa ka YESS Meghalaya Scheme kum ka lad kaba kongsan ha kaba ki skul bad ki lad ïalehkai jong ki samla ki lah ban ïoh ïa ka jingkyrshan bad ki grant-in-aid. La ïoh jingtip ba ki don katto katne ki skul ha Tura kiba dang hap ban apply hapoh katei ka skhim.
U la ban jur ruh ïa ka jingdonkam ban shimkhia kham bun ha kaba ïadei bad ka jingthung ïa ki Physical Education Teachers ba tbit ha ki skul Sorkar, kaba pynlah ïa ki skul ban ai jingmut kham bha kumba la buh ryntih bad kaba ïadei bad ka kam ïalehkai ba man la u snem.
Ha kane ka jingïalang la ïoh ruh ban ïakren shaphang ki jingthmu bapher bapher ba la ai da ka Sorkar Meghalaya haba ïadei bad ka kam ïalehkai, kynthup ïa ki khusnam pisa, ki scholarship bad ki lad ïoh kam ïoh jam ïa ki nongjop takma ha ka kyrdan National Games, nalor ka jingkyrshan ba la ai sha ki State Sporting Associations ba pynlong ïa ki lympung bad ki jingïakop.
La kyrpad shuh shuh ïa ki jaka pule ba kin pyrkhat ban shim, thaw bad pynroi ym duna ïa ka arphew (20) tylli ki jait jingïalehkai Olympic kiba la ithuh, bad ka jingthung ïa ki coach lah ruh ban kyrshan lyngba ka skhim Yess Meghalaya katkum ka jingdon jong ki jingtei bad ki jingdonkam.
Ka MSOA ka la pynpaw ïa ka jingangnud jong ka ban ai ïa ka jingkyrshan bad jingpynshai kaba donkam sha ki jaka pule kiba kwah ban shim ïa kane ka jingthmu.