Khlem hiar ki nongïalam ka Hima Sohiong sha Umshalani hadien ka jingtmu pynieng jingthoh dak (Signboard)

Nongpoh, Nailar 29: Hadien ba ki bor synshar district ka Ri-Bhoi lyngba u District Magistrate u la pynmih da ka hukum ban khang pyrshah ïaka jinglum briew palat 5 ngut haka shnong Umshalani namar ka jingioh jingtip ba ki briew jong ka Hima ki lah ban hiar sha katei ka shnong ban leit pynieng ïaki jingthoh dak (Signboard), la ioh jingtip ba kitei ki nongïalam shnong ki khlem hiar sha katei ka shnong khappud ka Meghalaya bad Assam kaba hap ha Jirang C&RD Block.
Kum ban shu pynpaw ba ki bor district kila pynmih ïaka hukum hadien ka jingtip kiba thikna, halor ka jingthmu jong u Syiem ka Hima Shiong lem bad ka kynhun ban pynieng da ka signboard haka shnong Umshalani, bad kiwei kiwei ki shnong khappud ka Ri-Bhoi District kaba don haki thaiñ khappud bad ka jylla Assam kaba hap ha Jirang Block, haka 29 tarik Nailar, 2026 kaba dei ruh ka jaka kaba ïakajia pud hapdeng ka Hima Jirang bad ka Hima Sohiong, bad ban khanglad ïa kane namar ka dei ka jaka kajia pud naka liang u District Magistrate ka Ri-Bhoi u la pynjari da ka kyndon aiñ 163 Bharatiya Nagarik Suraksha Sanhita, 2023 ban khanglad na kano kano ka huri hura kaba lah ban mih ha katei ka shnong bad ruh kaba lah ban ktah ïaka shongsuk shongsaiñ ki paidbah bad kino kino kiba leh pyrshah kin ngat haka kyndon aiñ.
Kumba la ioh jingtip mynta ka sngi kam don kano ka jingleit pynieng signboard sha katei ka shnong ne kiwei kiwei ki shnong ba mar jan da ka Hima Sohiong.