Balei ka jingkha khun da kaba shu puid ka la kynrei bha ha kane ka juk mynta buh jingkylli u Dr.Mukul
Ka lah ban dei ba ki kmie mynta ki kham tlot bor: Wailad
Shillong, Nailar 28: Ka jingkiew ka jingpynkha khun da kaba shu puid ne caesarean ha kane ka juk kaba mynta ka la wanrah ka jingkhuslai ïa ki nongthaw aiñ ka jylla ha kaba kane ka la mih ha ka jingïatai niah hapoh ka Ïingdorbar Synrai ha ka sngi Thohdieng, bad ka Sorkar ka la ai jingkular ba kan pynlong ïa ka jingwad bniah halor kane ka phang.
Haba kwah ban tip halor ki jingjia ki jingkha khun ki long kmie ha ki ïing ki sem na ha ki jaka sumar, u Nongïalam ka Liang Pyrshah u Dr. Mukul Sangma ula wanrah ïa kane ka mat ha ka jingkylli bynrap hapoh ka kynta kylli jingkylli bad kdew ïa ka jingkylla ha ka rukom pynkha khun na kaba shu kha hi ka kmie sha ka jingshim ïa i khyllung da kaba puid.
Haba ai ïa la ka jong ka nuksa, ula ong ba ma u bad ki para ki dei kiba la kha hi ka Kmie ha ïing, hynrei mynta ka jingkha hi ka kmie ka la hiar bha bad ka jingpuid la pyntip ba ka la jur bha ha kine ki por bad ki juk kiba mynta.
U Dr. Mukul u la buh jingkylli la ka Tnad ka Koit ka Khiah ka don jingkheiñ ne em ban sngewthuh ïa ka nongrim jong kane ka jingkiew ka jingpynkha khun ba shu puid kaba la i kumba ka la long kongsan bha mynta.
Haba jubab ïa kane, u Myntri ka Koit ka Khiah u Bah Wailadmiki Shylla ula ong ba watla ka jingpynkha khun da kaba shu puid ka dang long hapoh ka national average, hynrei kane ka kam ka long kaba sngewkhia bha.
Ula ong ba ka Tnad kam jied satia ïa ka jingpynkha khun ba shu puid laitnoh satang lada don ka jingeh ba ki Kmie kim lah ban shu kha hi ne ba don ki jingpang ne ba dei ba ikhun ban kha idon hapdeng ki jingeh.
U Myntri ula ong ba ki lah ban don shibun ki daw ha lyndet kane ka jingkiew, kynthup ba ki Kynthei kila kham tlot ka bor haba nujor bad ki por ba la leit bad ba ka jingïapher ha ka jingkha khun haduh lai bad saw sien-ka ktah ïa ka bor ka Kmie nalor kiwei kiwei pat ki daw.
“Ngin sa thaw ïa ki lad kat kaba lah ban kiar na ka jingpynkha khun da kaba shu puid” bynrap u Bah Wailad da kaba ong ban pule bniah ba balei kane kam jia ha ki por kiba mynshwa.