Sdang ka Civil Hospital Mawkyrwat ban pyntreikam ïa ka URSL Surgery ban sumar ïa ki nongpang

Mawkyrwat, Nailar 27 : Ka Civil Hospital Mawkyrwat, South West Khasi Hills District ka la sdang ban pyntreikam ïa ka URSL Surgery (Ureteroscopic Lithotripsy) kum kawei na ki rukom sumar kiba mynta ban ïarap ïa ki nongpang kiba don ïa ki maw jong u khyllai kiba la don ha u pipe khyllai.
Ka jingpyntreikam ïa kane ka rukom sumar ka pyni ïa ka jingïaid shaphrang jong ka Civil Hospital Mawkyrwat, kaba mynta ka la kynjoh sha ka khadsaw snem naduh ka jingshna ïa u Mawnongrim, bad kaba la dap saw snem naduh ka sngi ba la plie paidbah ïa ka jingtei jong ka hospital. Ha kine ki snem, ki jingshakri paidbah ha kane ka jaka sumar ki la nang kiew stet lyngba ka jingïatreilang bad ka jingtrei shitom jong ki doktor, ki nurse bad kiwei kiwei ki nongtrei hapoh kane ka jaka sumar.
Ka jingpyndonkam ïa ki kor ki bor bad ki rukom sumar kiba thymmai ka long kawei na ki dak jong ka jingïaid shaphrang jong ka Civil Hospital Mawkyrwat, bad lah ruh ban ong ba ka dei ruh kawei na ki jaka sumar ne Government Hospital ba nyngkong ha Meghalaya ban leh ka URSL lait noh na ka jaka sumar ha Nongbah Shillong ka NEIGRIHMS bad na ki jaka sumar shimet ne Private Hospital.
Namarkata, lyngba kane ka jingai jingshakri kan kham pynjan bad kham pynsuk ïa ki nongpang hapoh ka South West Khasi Hills District, ha kaba kin da donkam shu ban leit jngai sha kiwei pat ki jaka sumar hynrei tang hapoh kane ka jaka sumar ka la biang pura.
Ha kaba ïadei bad ka jingsdang pyntreikam ïa ka URSL Surgery, la ïoh ruh ban ïakren bad Dr. D. Suting, General Surgeon hapoh ka Civil Hospital Mawkyrwat, uba la ai jingtip shuh shuh shaphang kane ka rukom sumar. La ïoh ruh ban ïakren bad uwei na ki nongpang uba la ïoh jingsumar lyngba kane ka rukom treikam ba thymmai bad ba nyngkong hapoh ka Civil Hospital Mawkyrwat.