Shillong, Nailar 27 : Ki nongsaid aiñ na kylleng ka Meghalaya ha ka Sngi Palei ki la ïaid paidbah hapoh ka lama jong ka High Court of Meghalaya Bar Association bad ki la thang ruh ïa ka dur tyngshop jong u Advocate General, Amit Kumar, da kaba pynskhem biang ïa ka jingdawa ban weng noh ïa u na ka kam.
U General Secretary jong ka Association, KC Gautam, u la ong ba baroh ki District Bar Association kynthup naduh Khasi Hills, Jowai, Tura bad Williamnagar ki la ïashim bynta ha ka jingïakhih, ha kaba bun bha ki dkhot ki la wan ïashim bynta.
Da kaba kdew ba ki la don bun ki jingjia kiba kum ka ka kynhun ki ïakhih pyrshah, u la ïathuh ba na ka Association ka la dep phah ïa ka resolution sha u Myntri Rangbah ban dawa ïa ka jingweng noh ïa u AG, da kaba kdew ïa ka rukom long jong u hapoh ka ïingbishar bad kiwei pat ki mat.
“Ha ka jaka ba u Myntri Rangbah un jubab hi da lade, ka jubab ka la wan lyngba u Amit Kumar hi, khlem kano kano ka jingpan map. U shu ong tang ba u sngew babe ïa kaba u la ong hapoh ka ïingbishar,” la ïathuh shuh shuh u Gautam.
U la bynrap ba ka jingpynkut ïa ka jingïaishah ka long ka video kaba la saphriang ha ka 24 tarik Nailar, ka sngi ba la pynlong ïa ka General Body Meeting ha baroh kawei ka jylla, ha kaba u Myntri Rangbah u la ong ba ka jylla ka long kaba donbok ban ïoh ïa u Amit Kumar uba la wan na Delhi.
“Kata ka la pynmong ïa ngi. Ka pynhiar dor ïa baroh ki nongsaid ain kiba trei ha kane ka jylla. Ka dei ka histori ba ki nongsaid aiñ ha ka jylla jong ngi ba kin mih sha surok ban pynpaw ïa ka jingpyrshah,” la bynrap shuh shuh une u nongïalam ka kynhun.
