Na South West Khasi Hills sdang ka HFU ban sngap ïa ki jingeh jong ki nongri sniang

Mawkyrwat, Nailar 27 : Hadien ka jingud jingnam jong ki nongrep sniang ha kaba ïa dei bad ka jinglynshop jong khlam sniang ha kylleng ka jylla, ka Hill Farmer Union mynta ka sngi ka la hiar ban ïa kynduh ïa ki nongrep sniang da kaba sdang na South West Khasi Hills District.
Ka Hill farmer union ha kane ka sngi ka la iaid ïa ki shnong kiba don sha shiliang um jong ka wah Rilang kaba ki la sdang naduh ka Shngimawlein, Nongbrei – Nongdom ter ter haduh Umdohlun ban lap ïa ki jingshisha bad ki jingeh jong ki nongri sniang.
U bah Comandar Shangpliang, President jong ka Hill Farmer Union haba ai jingkren ha ki lad pathai khubor u la ong ba ka jingwan ka jong ki ban ia kynduh ïa ki nongri sniang kam dei tang ha South West Khasi Hills District hynrei ka dei sha baroh ki district hapoh ka jylla, ha kaba ka seng ka bthah ia ki shnad trei kam bapher bapher ba kin lum kyrteng ïa ki nongri sniang kiba sha ktah ha kane ka khlam sniang ha ryngkat ka jingiatreilang bad ki rangbah shnong khnang ba ka Hill Farmer Union kan rah bad pynsngew sha ka sorkar ïa ki jingeh jong ki nongrep kiba la ia kynduh ha kine ki por.
Ha ka juh ka por u bah comandar shangpliang u la ong ba ka sorkar ka dei ban buh ia ka jaka eksamin ne jaka test ïa ki sniang kiba wan nabar jylla ban pynrung ha khappud Meghalaya bad Assam namar ym lah ban tip ki sniang kiba wan nabar jylla la ki long ne em kiba biang ne kim biang namar kumba long mynta kane ka jingpang ka dei kaba wan na bar jylla. Sa kawei ka sorkar ka dei ban pynbiang ïa ki dawai sniang bad kum juh ruh ïa ki nongtrei na ka bynta jong ki mrad.
U la ong ruh ba ka sorkar ka buh ia ka thong ba ia ka jylla Meghalaya kan dei ka jylla ka ban sa kynjoh sha ka 10 billion US Dollar hynrei la tep noh ha ka jingjot jong ki nongrep. Kumta ka la dei ka por ba ka sorkar ka hap ban thaw ki lad ki lynti jingiarap na ka bynta jong ki nongrep lem kumta ki nongrep kim pdiang ia kane.
Ha kane ka sngi ka la don ruh ka jingïaid paitbah ha ka shnong Nongbrei – Nongdom ban pynsngew sha ka sorkar ïa ki jingeh kaba ki nongri sniang ki la ïa kynduh.